Avstraliya tashqi ishlar vaziri Maris Peyn Rossiya-Ukraina chegarasidagi vaziyat keskinlashgani sababli mamlakat elchixonasi vaqtinchalik Kiyevdan Ukrainaning Lvov shahriga ko‘chirilishini e’lon qildi. Bu haqda “Interfaks” xabar berdi.
Avstraliya bosh vaziri Skott Morrison matbuot anjumanida vaziyat “juda xavfli bosqichga yetganini” aytdi. Shu bilan birga, u Xitoyni Rossiya harakatlariga javob bermayotganlikda aybladi.
“Xitoy hukumati Avstraliyani tanqid qilishdan zavqlanadi, biroq u Ukraina chegarasida Rossiya qo‘shinlarining to‘planishi haqida xavotirli sukut saqlamoqda”, — dedi Morrison.
Shuningdek, Kanada ham Rossiya-Ukraina chegarasidagi keskinlik tufayli o‘z elchixonasini vaqtincha Kiyevdan Lvovga ko‘chirmoqda. Bu haqda Kanada tashqi ishlar vaziri Melani Joli Twitter’da yozgan.
“Xavfsizlik bilan bog‘liq vaziyat yomonlashishda davom etayotganini hisobga olib, faoliyatimizni vaqtinchalik Lvovdagi idorada olib boramiz va Kiyevdagi elchixonamiz faoliyatini vaqtincha to‘xtatamiz”, — deyiladi bayonotda.
Uning qo‘shimcha qilishicha, Kanada Ukrainadagi diplomatik ishtirokini davom ettiradi.
So‘nggi kunlarda AQSh va uning ittifoqchilari Rossiya Ukraina hududiga harbiy bosqin tayyorlayapti, degan xavotirlar fonida ko‘plab davlatlar Ukrainadagi diplomatik ishtirokini qisqartirishga urinmoqda. 2021-yilning kuzidan beri g‘arb Ukraina bilan chegaralar yaqinida Rossiya qo‘shinlari to‘plangani haqida xabar bermoqda.
12-fevral kuni AQSh davlat kotibi Entoni Blinken Rossiyaning Ukrainaga bosqini istalgan vaqtda, jumladan, Pekindagi Olimpiada o‘yinlari yakunlanguniga qadar boshlanishi mumkinligini aytdi. Rossiya tashqi ishlar vazirligining rasmiy vakili Mariya Zaxarova o‘zining Telegram’dagi kanali orqali Amerika hukumatining bayonotini “jazavaga tushish” deb atadi.
Avvalroq Niderlandiya, Chernogoriya, Yaponiya va Janubiy Koreya o‘z fuqarolariga Ukrainaga bormaslikni tavsiya qildi va u yerda bo‘lganlardan mamlakatdan chiqib ketishni so‘ragandi. 10-fevralda AQSh davlat departamenti fuqarolarga Ukrainaga bormaslik yoki zudlik bilan Rossiya harbiy harakatlari xavfi bo‘lgan va COVID-19 bilan kasallanishlar ko‘paygan hududdan ketishni tavsiya etgan. AQSh prezidenti Jo Bayden Ukrainadagi barcha amerikaliklardan hoziroq mamlakatdan ketishni so‘ragan.
Izoh (0)