Жиззах вилоятининг Ғаллаорол туманида алкоголь маҳсулотларини ишлаб чиқариш билан шуғулланган яширин корхона фаолиятига чек қўйилди, деб хабар беради Бош прокуратура ҳузуридаги департамент.
Маълум қилинишича, департаментнинг Ғаллаорол туман бўлими ва ИИБ ҳамкорлигида тезкор тадбир ўтказилди. Тадбир давомида фуқаро Б.Б. ўзининг яшаш хонадонида қўлбола усулда алкоголь маҳсулотларини ишлаб чиқариш фаолияти билан шуғулланиб келаётгани аниқланган. Ушбу хонадондан умумий қиймати 21,6 миллион сўмлик истеъмол учун яроқсиз 219 дона алкоголь маҳсулотлари, 997 дона акциз марка ва ишлаб чиқариш жараёнида фойдаланилган ускуналар ашёвий далил сифатида олинган.
Мазкур ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш) билан жиноят иши қўзғатилиб, тергов ҳаракатлари ўтказилмоқда.
Аввалроқ Қорақалпоғистонда қўлбола усулда «Қаратау» спиртли ичимлиги ишлаб чиқарадиган яширин корхоналар фаолиятига чек қўйилгани тўғрисида хабар берилганди.
Изоҳ (0)