Тошкент шаҳрида жойлашган 21-сонли Меҳрибонлик уйида тарбияланаётган бола тарбиячи томонидан калтакланди. Бу ҳақда ЎзА хабар қилмоқда.
Қайд этилишича, январь ойида Бола ҳуқуқлари бўйича вакил номига Меҳрибонлик уйида тарбияланаётган А. исмли болага Б. исмли эркак тарбиячиси куч ишлатиб, жисмоний тазйиқ ўтказаётгани ҳақида маълумот келиб тушган. Бола ҳуқуқлари бўйича вакил ушбу ҳолат юзасидан ўрганиш ўтказган.
Тарбияланувчи А. билан суҳбат ўтказилганда юқоридаги ҳолатларни тасдиқлаган. Унинг ўнг тирсак соҳаси лат еб, кўкаргани маълум бўлган.
Боланинг сўзларига кўра, навбатчи тарбиячи юқоридаги ҳолат бўлишидан олдин ҳам бир неча маротаба унинг танасининг турли жойларига уриб тан жароҳати етказган. Бироқ у қўрқув остида ушбу ҳолатлар ҳақида ҳеч кимга мурожаат қилмаган.
Мониторинг жараёнида тарбияланувчининг танаси шифокорлар иштирокида кўздан кечирилган. Натижада боланинг танасида кўкарган яралар борлиги, бош қисмида ҳам оғриқ мавжудлиги аниқланган.
Тарбияланувчи А. навбатчи ҳамширанинг олдига тушиб, ўнг қўлининг лат еб, кўкарган тирсак қисмига суртма дори сурдирганлик ҳолати «Амбулатор журнали»да қайд этилмагани маълум бўлган.
Бош прокуратурага ҳолатни ўрганиб, вояга етмаган шахсга нисбатан тан жароҳати етказилганига ҳуқуқий баҳо бериш сўралган.
Шунингдек, келгусида А.га нисбатан бўлиши мумкин бўлган турли хил тазйиқларнинг олдини олиш мақсадида навбатчи тарбиячини меҳнат қонунчилигига мувофиқ вақтинчалик ишдан четлатиш масаласи кўриб чиқилиши учун Халқ таълими вазирлигига хат киритилган.
Изоҳ (0)