Ўзбекистоннинг 3 та ҳудудида тадбиркорларнинг мулкини ўзлаштирган моддий жавобгар шахслар аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Тошкент шаҳар Чилонзор туман бўлими томонидан тадбиркорлик субъэктларининг ҳуқуқларини ҳимоя қилиш юзасидан терговга қадар текширув ўтказилган. Унда Р.А. МЧЖ кассири Ж.Ф. ўзига ишониб топширилган авиабилет ва туризм йўлланмалари савдосидан тушган 1,2 миллиард сўмни ўзлаштириш йўли билан талон-торож қилгани аниқланган.
Шунингдек, департаментнинг Хоразм вилояти Қўшкўпир туман бўлими томонидан терговга қадар текширув ўтказилган. Унда Р.С. исмли шахс Х.А. МЧЖнинг жами 421,1 миллион сўмлик (53 бош чорва моли ва қишлоқ хўжалиги ускуналари) мулкини ўзлаштириш йўли билан талон-торож қилгани аниқланган.
Бундан ташқари, департаментнинг Нукус шаҳар бўлими томонидан ҳам терговга қадар текширув ўтказилган. Унда Б.А. МЧЖнинг моддий жавобгар шахслари ўзларига ишониб топширилган 200 миллион сўмлик маиший техникаларни ўз манфаатлари йўлида ишлатиб, ўзлаштириш йўли билан талон-торож қилгани маълум бўлган.
Ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)