Андижон вилоятининг Шаҳрихон туманидаги «Қоракўрпа» маҳалласида жойлашган хусусий шифохонада газ портлаши содир бўлгани, оқибатда бир киши вафот этгани хабар берилганди. Воқеа тафсилотларини ўрганган «Дарё» мухбирининг ёзишича, бинодаги портлашга скотчланган газ баллони ҳамда газ сўрғичлари сабаб бўлган бўлиши мумкин.
Шаҳрихон туман Фавқулодда вазиятлар бўлими бошлиғи ўринбосари, подполковник Жобир Сиддиқовнинг маълум қилишича, портлаш ҳақида бўлимга соат 11:30 да хабар берилган. Шундан сўнг воқеа жойига иккита қутқарув экипажи юборилган.
Фавқулодда вазиятлар вазирлиги Андижон вилояти бошқармасининг Оммавий ахборот воситалари ва жамоат ташкилотлари билан ҳамкорлик қилиш гуруҳи бошлиғи, майор Сардор Зулуновнинг қўшимча қилишича, қидирув ишлари давомида тан жароҳати олган тўрт нафар фуқаро шифохонага жойлаштирилган, шунингдек, бир нафар фуқаронинг вафот этгани аниқланган. Ҳолат юзасидан дастлабки, терговга қадар суриштирув ишлари амалга оширилмоқда.
«Дарё» мухбири билан суҳбатлашган Шаҳрихон туман тиббиёт бирлашмаси марказий шифохонасининг қабулхона-диагностика бўлими мудири Отабек Аҳлиддиновнинг маълумот беришича, ўша куни шифохонага 11 нафар бемор олиб келинган.
«Тез ёрдам машиналарида олиб келинган беморларга олган тан жароҳатининг оғир ёки енгиллигига қараб ёрдам кўрсатилди. Енгил жароҳат олган фуқаролар назоратда бўлиши учун уларга амбулатор равишда яшаш жойига жавоб берилган. Тўлиқ текширувдан ўтказилиши керак бўлган тўрт нафар бемор эса шифохонада олиб қолиниб, улар билан даволаш ишлари олиб борилмоқда. Ўрта оғирликдаги бир нафар бемор вилоят соғлиқни сақлаш бошқармаси бошлиғи ташаббуси билан республика шошилинч тиббий ёрдам илмий маркази вилоят филиалига ўтказилди», — дейди Отабек Аҳлиддинов.
Портлашдан жароҳатланган Муҳаббат Бойматованинг айтишича, у ўша куни эрталаб опаси Муқаддам Бойматова билан марказга зулук қўйдириш учун борган. Воқеа юз берган вақтда у даволанаётган хонада уч аёл ва бир эркак бўлган.
«Менинг ‘давлением’ бор, зулук олса ‘давление’ тушади дейишгани учун бу ерга биринчи марта келгандим. Соат 09:25 ларда зулук қўйдирдим. Соат 10:30 да ишимизни тугатиб, кетиш ҳаракатида эдик. Бирдан ‘қарс’ этган овоз эшитилиб, тепадан цемент (бетон плиталар) ёрилиб бошимизга туша бошлади. Ўзимиз эса бетон ёрилиб, пастга қуладик. Худди ер ёрилди-ю, зилзиладан ер тагига тушиб кетгандек бўлдик. Ҳаммаёқ чанг. Ерга тушиб, энгашиб ётиб қолдик. Устимизга тепадан кўп нарса қулади. Шундан кейин шифохонага олиб келишганини билдим, холос. Ҳозир ҳолатим яхши», — дейди Муҳаббат Бойматова.
Портлаш содир бўлганда бинода бўлган марказ шифокори Набижон Эсонов воқеа юз берган пайтда хонасида ўтирганини, портлаш овозини эшитгач, қисқа вақтда пастга қулаб тушганини айтмоқда.
«Стулда ўтиргандим. Жума намозига чиқиш учун тайёргарлик кўраётгандим. Бангиллаган овоз эшитилди, кейин нима бўлди билмайман, ўрнимдан турсам ‘подвал’да ётган эканман. Сўнгра ўрнимдан туриб, деразадан ошиб тушдим ва ишчиларга ёрдам бердим», — дейди Набижон Эсонов.
«Ҳудудгаз Андижон» газ таъминоти филиали раҳбарининг биринчи ўринбосари, бош муҳандис Раҳматилло Темиров объект тўлиқ газлаштирилганини, чақнаш қандай юз бергани бўйича ўрганиш олиб борилаётганини маълум қилди.
«Шифохона табиий газ билан газлашган объект бўлиб, техник ижро ҳужжатлари ҳаммаси қонунийлаштирилган. Ҳозирда чақнаш ҳолати қандай юз бергани бўйича ўрганиш ишлари олиб борилмоқда ва хулосаси бўйича қўшимча маълумот берилади», — дейди Раҳматилло Темиров.
Воқеа гувоҳларидан бирининг «Дарё» мухбирига маълум қилишича, тадбиркор бинони иситиш мақсадида табиий газ билан бирга скотч газ баллонларидан ҳам фойдаланган. Шунингдек, бинонинг ер тўла қисмига шланк орқали газ ўтказилган. Натижада ер тўлада газ димланиб қолган. Бундан ташқари бинони тозалаш давомида газ сўрғичлар ҳам топилган.
Изоҳ (0)