Фарғона вилоятида Malibu-2 русумли автомашинада нуқсонлар борлиги кузатилгани боис янгисига алмаштирилиб берилди, дея хабар бермоқда Истеъмолчилар ҳуқуқларини ҳимоя қилиш агентлиги.
Маълум қилинишича, Риштон туманида яшовчи фуқаро Malibu-2 автомобилини 2020 йилнинг май ойида сотиб олган. Бир неча ой ўтгач, автомобиль эгаси кузовдан бўёқ сизиб чиқа бошлаганини пайқаб қолган. Истеъмолчи «Kokand Auto Trade» МЧЖ автосалонига бир неча ой мурожаат қилган. Мурожаат натижасиз бўлганидан сўнг, истеъмолчи Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлигида мурожаат қолдирган.
Чакана савдо қоидаларига асосан кафолат муддати мобайнида автомобилларни алмаштириш, кузов ёки камида иккита агрегатни алмаштириш зарур бўлган тақдирда, эксперт комиссияси қарорига кўра (ушбу қоидаларнинг 130-бандига мувофиқ) амалга оширилади.
Хусусан, хизмат кўрсатиш маркази ўтказган экспертиза натижаларига кўра, кузовнинг 113 та жойида бўёқларнинг нуқсонлари борлиги қайд этилган. Экспертизадан сўнг, истеъмолчи бир неча ой давомида автомобиль билан боғлиқ муаммоларни ҳал қилиш учун ишлаб чиқарувчига ҳам, автосалонга ҳам қайта-қайта мурожаат қилган.
Истеъмолчилар ҳуқуқларини ҳимоя қилиш агентлигининг Тошкент шаҳар ҳудудий тузилмаси томонидан 2021 йилнинг 8 октябрь куни рўйхатга олинган мурожаатга кўра, тузилма ходимлари томонидан UzAuto Motors АЖ ва «Узавтотеххизмат» МЧЖга сўров хати жўнатилган ва ишнинг барча тафсилотлари биргаликда ўрганиб чиқилган.
Ўрганиш натижаларига кўра, ушбу масала истеъмолчи фойдасига ҳал қилинган, яъни истеъмолчи билан «Узавтотеххизмат» МЧЖ ўртасида тузилган шартнома асосида Malibu-2 нуқсонли автомобиль худди шундай русумдаги янги автомобилга айлаштирилган.
Аввалроқ Бухорода 10 километр ҳам юрмаган Tracker’нинг нуқсонлари чиққани боис янгисига алмаштириб берилганди.
Изоҳ (0)