Бухоро вилоятида президент Шавкат Мирзиёевдан дакки эшитиб, сўнгра ишдан олинган собиқ амалдор янги лавозимга тайинланди, дея хабар берди «Дарё» мухбири.
Маълум бўлишича, давлат раҳбарининг вилоятга ташрифларидан бирида президентнинг «Камроқ гапиринг, менга баландпарвоз гаплар ёқмайди», деган эътирозига сабаб бўлган собиқ амалдор Йўлдош Жумаев вилоят касбий таълимни ривожлантириш ва мувофиқлаштириш ҳудудий бошқармаси бошлиғи лавозимига тайинланган.
Қайд этилишича, Шавкат Мирзиёевнинг Бухорога ташрифи пайтида Йўлдош Жумаев вилоят ҳокимининг собиқ ўринбосари, вилоят маҳалла ва оилани қўллаб-қувватлаш бошқармаси бошлиғи вазифасида ишлаб келган. Шундан сўнг лавозимидан олинган собиқ раҳбар 2021 йилнинг 21 декабридан бери ишсиз бўлган.
Йўлдош Жумаев 1967 йил Бухоро вилоятининг Ромитан туманида туғилган. 1991 йилда Бухоро давлат педагогика институти, 1999 йилда Бухоро давлат университетини, 2002 йилда Давлат ва жамият қурилиши академиясини тамомлаган.
У фаолияти давомида Ромитан тумани ҳокими ўринбосари, Когон тумани ҳокими лавозимларида ишлаган.
Изоҳ (0)