Ўзбекистон Маданият ва санъатни ривожлантириш жамғармаси Тошкентнинг Эски шаҳар ҳудудида арт-резиденциялар яратиш ташаббусини илгари сурди. Бу ҳақда жамғарма матбуот хизмати хабар берди.
Таъкидланишича, лойиҳа дизайн-концепцияси жаҳон талабларини инобатга олган ҳолда Марокашдаги «Студио КО» меъморчилик бюроси билан ҳамкорликда ишлаб чиқилади. Ушбу лойиҳа Алишер Усмоновнинг «Санъат, илм ва спорт» ҳайрия жамғармаси кўмагида амалга оширилади.
«Юртимиз ва чет элликлар ичун ижодий масканни ташкил этиш бўйича пойтахтимизнинг Олмазор туманида жойлашган иккита объект танлаб олинди», — дейилади хабарда.
Биринчи объект «Намуна» маҳалласида жойлашган, анъанавий меъморий кўриниши сақлаб қолинган ҳамда қайта таъмирланган «Маткаримбой» мадрасаси бўлиб, ушбу манзил ижодий майдон яратиш учун хизмат қилади. Иккинчи объект эса эски болалар боғчаси – «Ҳастимом» маҳалласида жойлашган.
Қайд этилишича, Тошкентдаги арт-резиденциялар Замонавий санъат марказининг таълим йўналиши учун платформа, ҳамда маҳаллий ва халқаро ижод вакиллари ўртасида ҳамкорлик учун хизмат қилади.
Февраль бошларида Тошкент шаҳридаги маҳаллалар ЮНЕСКОнинг Бутунжаҳон маданий мероси дастлабки рўйхатига киритилгани тўғрисида хабар берилганди. Маълум қилинишича, Эски шаҳар маҳаллалари маданий қатламларини сақлаб қолиш бўйича дастлабки қадамлар 2019 йилда Венеция архитектура Биенналесида тақдим этилган «Маҳалла: шаҳар ва қишлоқ ҳаёти» лойиҳаси ишлаб чиқилганда амалга оширилган. Маҳаллалар халқаро экспертлар томонидан экоархитектурани тиклаш, замонавий шаҳарларни оммавий урбанизациядан асраш, шунингдек, ижтимоий қадриятлар ва жамоавийликни сақлаб қолиш усули сифатида эътироф этилган.
Изоҳ (0)