2021 йилда бутун дунёда ўз вазифасини бажариш вақтида ҳалок бўлган журналистлар сони охирги 30 йил ичидаги кўрсаткичларга нисбатан қисқарди, бироқ матбуотга босим даражаси барча рекордларни янгилади. Бу ҳақда Журналистлар халқаро федерацияси ўз ҳисоботида маълум қилган, дея хабар берди «Интерфакс».
ЖХФнинг 31 йиллик ҳисоботида 2021 йил давомида 47 нафар журналист қасддан қилинган ҳужум, портлашлар ёки отишмалар оқибатида ҳалок бўлгани, яна икки ўлим тасодиф деб топилганини қайд этган. 2021 йилда журналистлар орасида кузатилган ўлимлар сони 2020 йилдагига нисбатан 18 тага кам.
«Бу борадаги кўрсаткичнинг тушганига қарамай, 2021 йилда журналистларга ва ОАВ эркинлигига нисбатан таҳдидлар сони кескин ортган», — дейилади ҳисоботда.
ЖХФ ҳисоботида ҳибсга олинган журналистлар сони рекорд даражада кўпайгани қайд этилган: «365 нафар одам репортажлари туфайли панжара ортига тушиб қолган, бу бир йил олдинги рақамдан (235 нафар) анча кўп. Матбуотга қилинган ушбу ҳужумлар асосан ОАВни тийиб туриш учун амалга оширилган».
ЖХФ журналистларнинг жамоатчиликни қизиқтирадиган мавзуларда қалам тебратгани учун, яъни норозилик намойишларини ёритгани ёки коронавирус сабаб юзага келган инқироз ҳақида хабар қилгани учун ҳибсга олинганини таъкидлаган.
«2021 йилда Pegasus жосус дастурий таъминотининг матбуот эркинлигига таҳдид бўлганининг гувоҳига айландик, ушбу дастур орқали журналистларга ҳужум қилиш учун уларнинг мобил қурилмалари кузатилган. Манбалар махфийлиги ва журналистларнинг хабарлари сир сақланишини таъминлаш тобора оғирлашиб бормоқда», – дея ёзган ЖХФ.
«Ўтган йили камида етти нафар журналист аёл ўз хизмат вазифасини бажараётган вақтида ўлдирилган. Афғонистон бу борада энг кўп бадал тўлаган мамлакатлардан бири», – дейилади ЖХФ ҳисоботида.
Шунингдек, халқаро ташкилот бутун дунёда журналист аёлларни онлайн таъқиб қилиш ҳолатлари кузатилаётганини таъкидлаб, таҳрирриятлар ва ҳукуматларни ушбу ёвузликни бартараф этиш чораларини кўришга чақирган.
Изоҳ (0)