Сўнгги бир неча кун ичида Суриянинг АҚШ назорати остида бўлган ҳудудларида 10 та теракт ва қўпорувчилик ҳаракатлари содир этилиши оқибатида қарийб 20 киши ҳалок бўлди, ўнлаб фуқаролар яраланди. Бу ҳақда Россиянинг мамлакатдаги Низолашаётган томонларни яраштириш маркази раҳбари ўринбосари Олег Журавлёвга таяниб, «Интерфакс» хабар берди.
«Сўнгги уч сутканинг ўзида минтақада 10 та теракт ва қўпорувчилик ҳаракатлари содир этилди. Оқибатда 18 киши ҳалок бўлди ва 25 киши яраланди», — дейди Журавлёв.
Унинг таъкидлашича, Қўшма Штатлар ва Буюк Британия террорчилик гуруҳлари аъзолари учун «амнистия» номли дастурни амалга оширишни давом эттирмоқда. «Радикал оқимларнинг юзлаб аъзолари қамоқдан озод этилди ва АҚШ назорати остидаги қуролли тузилмалар сафига қабул қилинди. Мавжуд маълумотларга кўра, уларнинг бир қисми Эт-Танф зонаси ҳудудига ташланган», — дея таъкидлайди у.
Журавлёвнинг қайд этишича, бу каби ҳаракатлар террорчилик хавфининг кучайишига сабаб бўлмоқда.
«Мавжуд маълумотларга қараганда, яширин тўдаларнинг етакчилари давлат хизматчиларига қарши ва Хомс, Дамашқ, Дера ва Ас-Сувайда вилоятларидаги объектларда қўпорувчилик ҳаракатларини амалга оширишни режалаштирмоқда», — дейди у.
Суриядаги низолашаётган томонларни яраштириш маркази раҳбари ўринбосарининг маълум қилишича, ўтган бир сутка ичида Идлибдаги деэскалация зонасида «Жабҳат ан-Нусра» террорчилик гуруҳи позицияси томонидан икки марта ўт очилгани қайд этилган. Террорчиларнинг снайпер ҳужумлари оқибатида Эл-Фататуат ва Кулжок туманларидаги икки нафар суриялик ҳарбий хизматчи яраланган.
Аввалроқ Байден Суриядаги махсус амалиётда ИШИД етакчиси ўлдирилганини эълон қилгани, ИШИД жангарилари Суриядаги қамоқхонага ҳужум қилиб, маҳбусларни озод этишга урингани тўғрисида хабар берилганди.
Изоҳ (0)