Диний ташкилотларнинг айрим вакиллари кимларгадир ҳукм ўқиши ҳуқуқий нуқтаи назардан нотўғри. Бу ҳақда адлия вазири Русланбек Давлетов жамоатчиликка берган анъанавий йиллик ҳисоботи давомида айтиб ўтди, деб хабар беради «Дарё» мухбири.
«Диний ташкилотларнинг айрим вакиллари чиқиб, ‘У ишни қилса, бундай бўлар экан, бу ишни қилса, бундай бўлади. Уни уйига кирманг. Бу нарсани ичса, бундай бўлади, маълум бир вилоятликлар бундай’, деган гапига ҳуқуқ нуқтаи назаридан биз чидаб туролмаймиз. Чунки бу, биринчидан, жамиятимизнинг бўлинишига олиб келяпти, иккинчидан, диний ташкилотларнинг бундай ихтилоф қилишга ҳаққи йўқ. Биласизларми нимага? Асосий сабаб мана шу айтилаётган инсонлар кимларгадир ҳукм ўқияпти. Ҳамма одамларга тамға босиш ҳуқуқи йўқ», — дейди адлия вазири.
Давлетов фуқаролар динга хоҳласа ишониши, хоҳламаса, ишонмаслигини ёки умуман тарки дунё қилиб яшаши мумкинлигини эслатиб, бу уларнинг конституциявий ҳуқуқи эканини таъкидлаган. Шунингдек, вазир диний ташкилотларга ва барча шу соҳадаги домлаларга «сигнал» бермоқчи эканини маълум қилган.
«Бир ‘сигнал’ни диний ташкилотларга ва барча шу соҳадаги домлаларимизга етказиб қўймоқчимизки, биз Адлия вазирлиги сифатида бу фаолиятни назорат қиламиз. Биз бу борада жуда фаол ишлаймиз. Чунки ҳеч қачон бу масалаларни бир нормага келтириб бўлмайди. Ҳамманинг ўз фикри бўлади, бу эса бўлинишга олиб келаверади. Шунинг учун ҳам қонунда ҳамма ўзи ҳал қилади, деган. Бекорга айтилмаган виждон эркинлиги, деб. Виждонининг олдида ўзи жавоб беради. Бўлмаса, ахлоқ полицияси қилайлик, кўчага чиқиб юбкаларнинг узун-калталигини ўлчайлик. Бунинг охири бўлмайди. Ҳаммада ёндашув ҳар хил. Мен бу гапларни ҳуқуқий нуқтаи назардан айтяпман. Менинг ахлоқий нормалар тўғрисида гапиришга ҳаққим йўқ. Гапирсам ҳам, ўзимнинг фуқаро сифатидаги фикримни айта оламан», — дейди вазир.
Аввалроқ Тошкент вилояти Зангиота тумани «Фатҳ» жоме масжидида имом ноиби вазифасида ишлаб келган Солихон Ортиқхўжаев ишдан бўшатилгани тўғрисида хабар берилганди. Солихон домла ижтимоий тармоқларда диний соҳа вакили мақомига зид чиқишлари учун бир неча бор Ўзбекистон мусулмонлари идораси раҳбарияти томонидан огоҳлантирилиб, унга тегишли кўрсатма ва тавсиялар берилган. Солихон домла 2021 йилда ўзининг чиқишларида амалдаги қонун талабларини бузгани учун маъмурий жавобгарликка тортилган. Аммо Солихон домла юқорида қайд этилган огоҳлантиришлардан тўғри хулоса чиқармаган.
Изоҳ (0)