Тошкент тиббиёт академиясининг фахрий профессори, академик Турғунпўлат Даминов 81 ёшида вафот этди. Бу ҳақда Инновацион ривожланиш вазирлиги хабар берди.
Маълумот учун, Турғунпўлат Даминов 1983 йилдан 1990 йилгача Ўзбекистон Соғлиқни сақлаш вазирлиги Педиатрия илмий-тадқиқот институти директори, 1990-2005 йилларда 1-Тошкент давлат тиббиёт институти ректори, 2005-2012 йилларда Тошкент тиббиёт академияси юқумли касалликлар ва педиатрия кафедраси мудири сифатида фаолият юритган. 2012 йилдан шу кунгача Тошкент тиббиёт академияси юқумли ва болалар юқумли касалликлари кафедраси профессори лавозимида лавозимида ишлаб келаётганди.
Даминов болаларда учрайдиган гепатитнинг давомли ва сурункали хиллари шаклланишини клиник-патогенетик нуқтаи назардан ўрганган. Болаларда учрайдиган Б-вирусли гепатитнинг давомли хилини самарали даволаш усулини ишлаб чиққан ва амалиётга татбиқ этган. Кўпинча чақалоқлар ўлимига сабаб бўладиган нафас йўллари касалликлари белгиларини аниқлаган.
1997 йилдан Ўзбекистон Олий Мажлиси депутати. Ўзбекистон «Адолат» социал-демократик партияси Сиёсий кенгашининг биринчи котиби (1995 йилдан). «Ўзбекистон миллий энциклопедияси» бош таҳрир ҳайъати аъзоси (1997 йилдан). Польша тиббиёт фанлари академияси академиги. «Дўстлик» ордени билан мукофотланган.
Турғунпўлат Даминов — педиатр-инфекционист олим, Ўзбекистон Фанлар академияси академиги (2000 йил), Ўзбекистонда хизмат кўрсатган врач (1980 йилдан), тиббиёт фанлари доктори, профессор ҳисобланади.
Аввалроқ академик Сайдиаҳрол Тўхтаев 79 ёшида, Ўзбекистоннинг фахрий журналисти Рустам Обидов 72 ёшида, академиклар Темурбек Усмонов ва Толиб Мўминов, Олим Маматқул Жўраев 65 ёшида, академик Бахтиёр Назаров 77 ёшида вафот этгани тўғрисида хабар берилганди.
Изоҳ (0)