Буюк Британияда 5 февраль, шанба куни қиролича Елизавета II тахтга ўтирганининг 70 йиллигини нишонлаш бошланди, деб ёзмоқда Reuters.
Елизавета II 1952 йил 6 февралда, отаси қирол Жорж VI нинг вафотидан сўнг Британия ва ўндан ортиқ бошқа қиролликлар, жумладан, Канада, Австралия ва Янги Зеландия қироличаси бўлганди.
95 ёшли қиролича ўзининг расмий вазифаларини бажаришда давом этмоқда, бироқ октябрь ойида номаълум касаллик туфайли касалхонада бир кечани ўтказгандан сўнг у омма олдида кам кўриниш бермоқда.
Ҳукмронлигининг 70 йиллиги муносабати билан Британия халқига йўллаган мурожаатида Елизавета II ўғли, шаҳзода Чарльз қирол бўлгач, унинг рафиқаси Камилланинг қироличалик тожини кийиши истагини билдирди.
«Ўғлим Чарльз қирол бўлганида, биламанки, сиз унга ва рафиқаси Камиллага ҳам менга кўрсатган ёрдамингизни аямайсиз; Вақти келганда Камилла қироличанинг турмуш ўртоғи сифатида танилишини чин дилдан тилайман», — деди Британия қироличаси.
Қироличанинг турмуш ўртоғи унвони қиролнинг рафиқаси у билан тенг ижтимоий мавқега эга эканини англатади. Бироқ, у ҳукмдорликнинг сиёсий ва ҳарбий ваколатларига эга бўлмайди.
Guardian нашрининг ёзишича, шаҳзода Чарльз ўзи тахтга ўтиргандан сўнг Камиллага қиролнинг турмуш ўртоғи унвонини бериш ва у билан бирга тож кийиш истагини анчадан бери изҳор қилиб келган. Шундан сўнг унинг унвони «қиролича Камилла» бўлиб янграйди.
Қиролича Елизавета II нинг Камиллага хайрихоҳлиги аввалроқ сезила бошлаган, деб ёзади Guardian. Мисол учун, декабрь ойининг охирида у Чарльзнинг рафиқасига энг олий даражадаги орден Қироллик хоними унвонини берганди. Кўпчилик экспертлар буни Камилланинг бўлажак қиролича мақомига яқинлашаётганидан далолат сифатида қабул қилган, дейилади нашрда.
Мавзуга доир:
Изоҳ (0)