Россия Украинага бостириб киришга тайёргарликнинг якуний босқичида — NYT

Россия Украина ҳудудига бостириб киришга ҳали тайёр эмас, аммо ҳарбий операцияга тайёргарликнинг якуний босқичида, деб ёзади The New York Times Украина қўмондонлигидаги манбаларга таяниб.

Хусусан, нашр суҳбатдошлари сўнгги икки ҳафта ичида Қримга 10 мингга яқин россиялик ҳарбийнинг ўтказилгани ва яриморолда жойлашган бўлинмаларнинг бир қисми юқори жанговар шай ҳолатга келтирилганини қайд этди. Шунингдек, Украина қўмондонлигидаги манбалар Қримга Россия гвардиясининг бўлинмаси юборилганидан хавотир билдирган, уларнинг фикрича, бўлинмадан босиб олинган ҳудудни назорат қилиш учун фойдаланилиши мумкин.

Нашрга интервью берган таҳлилчиларнинг таъкидлашича, Қримдан ташқарида, Украина билан чегарага яқин жойда ҳарбий амалиётга «дарслик каби» тайёргарлик кўрилмоқда — касалхоналар ва алоқа тизимларини жойлаштириш, душманнинг радиоэлектрон воситаларига қарши чоралар кўриш, авиация ва қўшимча ҳарбий қисмларни жойлаштириш каби.

Мутахассисларнинг фикрича, Россия ҳарбий амалиётга тайёргарликни бир неча ҳафта ичида якунлаши мумкин. Чегаралар яқинида Россиянинг етарли миқдордаги қўшинлари бор, бироқ таъминот линиялари ва бошқа инфратузилмалар тўлиқ қурилмаган, дея таъкидлаган улар.

Шу билан бирга, нашрнинг ҳам Украина қўмондонлигидаги, ҳам экспертлар ўртасидаги суҳбатдошларининг фикрича, Россия Украина билан чегара яқинида қўшинларини жойлаштириш орқали айнан қандай мақсадларни кўзлаётгани ҳалигача ноаниқ.

Бир неча ойдан буён Ғарб сиёсатчилари ва оммавий ахборот воситалари Россиянинг Украина билан чегараси яқинида ҳарбий кучлар тўплаётгани ҳақида хабар бермоқда, уларнинг фикрича, бу босқинга тайёргарлик бўлиши мумкин. Агар Украинага ҳужум бўлса, Ғарб давлатлари Россияга қарши санкциялар қўлламоқчи.

Россия ҳукумати Украинага ҳужум қилмоқчи эмаслигини айтиб, чегара яқинида ҳарбий қисмларнинг жойлаштирилишини оддий машғулотлар билан изоҳламоқда.

4 февраль куни Американинг Bloomberg агентлиги ўзининг сайти орқали «Россия Украинага бостириб кирди» сарлавҳали хабарни эълон қилиб юборди. Кейинроқ агентлик хатосини тан олиб, сарлавҳани ўчириб ташлаган.