Ижтимоий тармоқларда Қашқадарёнинг ягона аёл ҳокими 2020 йилнинг март ойидан бери Қарши туманини бошқариб келаётган Мақсуда Мустафоева ишдан бўшатилгани ҳақида хабарлар тарқалди. Орадан икки кун вақт ўтса-да, туман ҳокимлиги ахборот хизмати мазкур маълумотни на тасдиқлади ва на инкор қилди. Шундан сўнг «Дарё» мухбири мазкур ахборотга аниқлик киритишга уринди.
Бу ҳақда «Дарё» мухбири билан суҳбатлашган Қашқадарё вилояти ҳокимлиги ахборот хизмати раҳбари Аҳрор Содиқов Мустафоеванинг ишдан кетганини тасдиқлади.
«Мақсуда Мустафоева ўз аризасига кўра ишдан олинди», — дейди Аҳрор Содиқов.
Аҳрор Содиқовнинг гапини рад этган «Дарё» манбаси эса 2022 йилнинг 2 февраль куни давлат раҳбари Шавкат Мирзиёев раислигида видеоселектор йиғилиши ўтказилганини, унда президент кўплаб туман ҳокимларининг иш фаолиятидан қониқмаётганини айтиб, Қашқадарё вилоятининг ягона аёл ҳокимини ишдан олганини билдирган. Ва бу бошқаларга «дарс» бўлиши кераклигини таъкидлаган.
Қарши туманини салкам икки йил бошқарган Мақсуда Мустафоева ҳокимликка киришганидан бир ой ҳам ўтмасдан, президент ишонч билдирган кластерни тугатиш ташаббуси билан чиқиб, кўпчилик эътиборига тушган бўлса, тадбиркорни туман учун боғча ёки мактаб қуриб бермасликда айблаши ортидан кўплаб муҳокамалар сабабчиси бўлишга ҳам улгурганди. Кейинчалик тадбиркор билан судлашишни бошлаган ҳоким тадбиркорни телефон қўнғироқларига жавоб бермасликда айблади.
Юз миллион сўмлик саховат пулларининг еб кетилиши ортидан яна интернетда кўриниш берган Мақсуда Мустафоева вилоятнинг собиқ ҳокими Зоир Мирзаевнинг афсусига ҳам сабаб бўлганди. Журналист ва блогерлар билан суҳбатлашган Зоир Мирзаев Мақсуда Мустафоева ҳақида гапириб, «Барчада хато ва камчиликлар бўлади, албатта. Раҳбар сифатида буни танқид қиламан. Яқинда Қарши тумани ҳокими билан суҳбатлашиб, камчиликларини кўрсатдим. Мен бошида унинг ишини кўрмасдан, ҳокимликка тавсия берганимни хатойим деб биламан», — деганди.
Изоҳ (0)