Namanganlik ota aliment to‘lovlari evaziga uch nafar farzandi uchun 500 mln so‘mlik hovli-joyni xatlab berdi
Namangan viloyatining Pop tumanida aliment to‘lovidan qarzdorligi bo‘lgan ota farzandlari uchun uyni xatlab berdi. Bu haqda “Daryo”ga viloyat MIB matbuot xizmati ma’lum qildi.
Fuqarolik ishlari bo‘yicha Chust tumanlararo sudining joriy yil 5-avgustdagi qaroriga asosan Nozimjon Ashurovdan (ism-shariflar o‘zgartirilgan) sobiq turmush o‘rtog‘i Dilbar Habibullayeva foydasiga aliment undirilishi belgilandi.
Ushbu hujjatga ko‘ra, Nozimjon Ashurov uch nafar farzandi uchun voyaga yetgunlariga qadar 135 million so‘m to‘lab berishi kerak edi. MIB Pop tuman bo‘limi mutasaddilari tomonidan ota bilan bir necha bor suhbatlar o‘tkazildi va mavjud qonun-qoidalar tushuntirildi.
Mazkur muloqotlardan so‘ng ota farzandlari uchun 500 million so‘m atrofida baholanayotgan uy-joyni hatlab berishga qaror qildi.
