Farzandlarining moddiy ta’minotidan bo‘yin tovlagan fuqarolarga nisbatan ma’muriy qamoq qo‘llanilgandan so‘ng 2 oy davomida aliment to‘lanmasa, jinoyat ishi qo‘zg‘atilishiga asos bo‘ladi. MIB Namangan viloyat boshqarmasi tomonidan bu borada tegishli choralar olib borilmoqda, deya xabar beradi “Daryo” muxbiri Azizbek Abduvaliyev.
Shokir Ahmedovdan (ism-sharif shartli) fuqarolik ishlari bo‘yicha Chust tumanlararo sudi buyrug‘iga asosan ikki nafar farzandi uchun aliment undirilishi belgilangan. Mazkur ijro hujjati MIB Pop tuman bo‘limi ish yurituviga olingan va qarzdor otaga nisbatan ijro ishi qo‘zg‘atilgan.
Davlat ijrochisi tomonidan Ahmedovga alimentni o‘z vaqtida to‘lash zarurligi tushuntirilgan. Biroq u 96 oy, ya’ni 8 yil davomida surunkasiga aliment to‘lashdan qasdan bo‘yin tovlab keladi. Qarzdorlik esa 64 million so‘mdan oshib ketgan.
Bu bo‘yicha to‘plangan hujjatlar sudga yuborilib, Shokir Ahmedov 2020-yilning 4-mart kuni ma’muriy javobgarlikka tortiladi va 15 sutka ma’muriy qamoq belgilanadi.
Ammo qarzdor ota ma’muriy qamoqdan keyin ham alimentdan qarzdorlikni to‘lamay keladi. Shundan so‘ng unga nisbatan Jinoyat kodeksining 122-moddasi 1-qismi bilan jinoyat ishi qo‘zg‘atildi va sud hukmi bilan 6 oyga ozodlikdan mahrum qilindi.
“MIB viloyat boshqarmasi ma’muriy amaliyot va surishtiruv sho‘basi tomonidan 2021-yilning o‘zida 21 ta holatda aliment to‘lamagan fuqarolarga nisbatan jinoyat ishi qo‘zg‘atildi. Ular 6 oydan 1 yilgacha bo‘lgan muddatga ozodlikdan mahrum etilgan”, —deydi boshqarma katta inspektori Sodiqjon Muhiddinov.
Izoh (0)