НАТОнинг амалдаги бош котиби Йенс Столтенберг Норвегия Марказий банки раҳбари этиб сайланди. Ушбу қарор Норвегия ҳукумати томонидан эълон қилинди, деб ёзмоқда Reuters.
Норвегия банкининг раҳбари 1 март куни алмашиши керак. Бироқ аввалроқ Столтенберг НАТО бош котиби лавозимида ваколат муддати тугагунига қадар — сентябрь ойи охиригача қолишини айтган эди.
Шундай қилиб, мартдан сентябргача Норвегия Марказий банкини вақтинчалик раҳбар бошқаради. Бу вазифа Норвегия банки раҳбарининг ўринбосари Ида Волден Бахега топширилади. У Марказий банк раҳбари лавозими учун курашда Столтенбергнинг асосий рақиби бўлганди.
Йенс Столтенберг — иқтисодчи ва Норвегиянинг собиқ бош вазири. У 2014 йилнинг октябрь ойидан бери НАТО бош котиби лавозимини эгаллаб келмоқда. Столтенберг декабрь ойи ўрталарида Норвегия Марказий банки раҳбари лавозимига ўз номзодини қўйишга розилик берганди.
Мухолифатчилар собиқ бош вазирнинг ушбу лавозимга тайинланиши Марказий банк мустақиллигига таъсир қилиши мумкин, деган фикрда Столтенбергнинг номзоди танланишини танқид қилган.
Изоҳ (0)