Сенатнинг йигирма учинчи ялпи мажлисида «Моддий-маданий мерос объектларини муҳофаза қилиш кучайтирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун муҳокама қилинди. Бу ҳақда Олий Мажлис Сенати хабар қилди.
Қайд этилишича, туризм йўналишини миллий иқтисодиётнинг драйвер соҳаларидан бирига айлантириш мақсад қилиб олинган. Моддий-маданий мерос объектлари муҳофазасини кучайтириш долзарб масалалардан бири ҳисобланади.
Муҳокама давомида Сенат томонидан Бухоро, Қашқадарё вилоятлари ҳамда Тошкент шаҳрида олиб борилган ўрганишлар мобайнида моддий маданий мерос объектларига жуда катта миқдорда зарар етказиш ҳолатлари аниқлангани, давлат муҳофазасига олинган айрим археологик объектлар йўқ бўлиб кетгани таъкидланган.
«Айрим ҳолларда Давлат бюджети маблағлари ҳисобига маданий мерос объектларида амалга оширилаётган ишлар реставрация қилиш талабларига зид равишда олиб борилиб, уларнинг тарихий ва бадиий қимматига кўп миқдорда зарар етказилмоқда», — дейилади хабарда.
Жумладан, Ситораи Моҳи Хосса тарихий мажмуасида олиб борилган реставрация ишлари аҳволи ўрганилганида мажмуада реставрация ишлари нотўғри олиб борилгани аниқланган. Оқибатда унинг бадиий безаклари, нақшлари, кошинлари нобуд қилиниб, тарихий ва бадиий қийматига жами 28 миллиард сўмлик зарар етказилган.
Мавжуд муаммоларнинг қонуний ечимини белгилаш мақсадида «Моддий-маданий мерос объектларини муҳофаза қилиш кучайтирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун ишлаб чиқилган.
Қонунда моддий маданий мерос объектларини нобуд қилиш, бузиш ёки уларга шикаст етказганлик учун жавобгарликни кучайтириш, бундай тоифадаги объектларга жуда кўп миқдорда зарар етказганликни ифодаловчи қилмишларни оғир жиноятлар тоифасига ўтказиш, Туризм ва спорт вазирлиги ҳузуридаги Маданий мерос агентлигининг ижро этилиши мажбурий бўлган кўрсатма ва тақдимномаларини белгиланган муддатда ва тўлиқ бажарилмагани юзасидан жавобгарликни белгилаш назарда тутилган.
Қонун сенаторлар томонидан маъқулланган.
Мавзуга доир:
- Паркентда археологик ёдгорлик ҳудуди ғишт ишлаб чиқариш учун сотиб юборилгани аниқланди
- Бухорода қўйхонага айлангани рад этилган «Чор минор» мадрасаси чорбоғида тандирдан ҳам фойдаланиб келингани маълум бўлди
- «Археологик ёдгорликларни муҳофаза қилмаслик — жиноят». Археолог Шоштепани консервация қилиш ишлари кечикаётганини маълум қилди
Изоҳ (0)