Наманганда «Маҳаллага китоб улаш!» лойиҳаси доирасида вилоятдаги 780 та МФЙга 80 мингдан ортиқ китоб етказилди. Бу ҳақда «Дарё» мухбири Азизбек Абдувалиев хабар бермоқда.
Вилоят ҳокими Шавкат Абдураззақов ташаббуси билан бошланган мазкур лойиҳадан мақсад маҳаллаларда китобхонлик маданиятини шакллантириш, МФЙлар қошидаги кутубхоналарни янги адабиётлар билан бойитиш эканлиги билдирилмоқда.
«Бугунги кунда Наманган вилоятидаги маҳаллаларда 150 мингдан ортиқ китоб фонди мавжуд. Ушбу акция доирасида 25 мингта китоб тарқатишни режалаштиргандик. Якунда эса бу ташаббус кенг ёйилиб, ҳокимликлар ва ҳомийлар томонидан маҳалла мутасаддиларига топширилган адабиётлар сони 80 мингдан ошди», — дейди вилоят Маҳалла ва оилани қўллаб-қувватлаш бошқармаси бош мутахассиси Сайфиддин Муҳиддинов.
Наманганда аҳоли қўлига етиб борган китобларнинг аксарияти ўзбек халқ оғзаки ижодига мансуб достон, эртак ва афсоналар, ижтимоий-сиёсий адабиётлар ҳамда Навоий, Улуғбек, Фаробий, Нақшбандий каби буюк сиймолар ҳақида ҳикоя қилувчи рисолалардан иборат.
Изоҳ (0)