Қашқадарё вилояти ҳокими Муроджон Азимовнинг оғзаки топшириғига биноан вилоят чегараларидаги йўл-патруль хизмати постларидан чигитни Самарқанд вилоятига олиб ўтиш тақиқлангани тўғрисида хабар берилганди. Монополияга қарши курашиш қўмитасининг аралашуви ва кўрсатмасига биноан вилоятдан чигит олиб чиқиб кетилган. Бу ҳақда қўмита матбуот хизмати хабар берди.
2 январь куни Самарқанд вилояти Каттақўрғон шаҳри ҳокими, сенатор Гавҳар Алимова шаҳарда қарийб 100 та иш ўрни яратган Marokand gold oil extraksiya корхонаси муаммога дуч келганини ёзганди. 28 декабрь куни компания раҳбари Сайдин Рўзиев шаҳар ҳокимиятига келиб, товар ва хом ашё биржасидан очиқ савдолар асосида сотиб олинган 100 тонна чигит маҳсулотини Қашқадарёдан Самарқандга олиб кела олмаётганини маълум қилган. Қашқадарё вилояти ҳокимлигига кўра, чигит ортилган юк машиналари «QR-кодли ҳисобварақ-фактураси бўлмагани» сабабли тўхтатиб қўйилган.
Кейинроқ «Оқсарой кластер» МЧЖ Самарқандга юборилган ва йўлда ушлаб қолинган чигит уруғлик чигит бўлиб, шу сабабдан вилоятдан олиб чиқилишига йўл қўйилмаганини маълум қилганди. Кластер захира уруғлик чигитини қайтариб олиб, Самарқанддаги Marokand gold oil extraksiya МЧЖ ёғ корхонасига 10 кун муддатда биржа савдолари орқали ютиб олинган техник чигитни етказиб берилишини билдирганди. Шунингдек, юзага келган барча харажатларни ўз ҳисобидан қоплаши айтилганди.
Монополияга қарши курашиш қўмитаси томонидан ушбу ҳолат назоратга олиниб, масалага ойдинлик киритиш мақсадида Қашқадарё вилояти ҳокимияти ва Қашқадарё вилояти ИИБга сўровнома юборилган. Вилоят масъуллари ва Қўмита ходимлари томонидан бир неча маротаба онлайн учрашувлар ўтказилиб, суриштирув ишлари олиб борилган.
Қўмитанинг кўрсатма қарорига биноан ҳозирги кунда Қашқадарё вилоятининг тегишли корхоналари томонидан биржа савдоларига қўйилган чигит маҳсулотлари тадбиркорлар томонидан вилоятдан олиб чиқиб кетилган.
Эслатиб ўтамиз, 2020 йилнинг ноябрида Қашқадарё, Сурхондарё ва Хоразм вилоятлари ҳокимларининг оғзаки кўрсатмасига биноан постлардаги йўл патруль хизмати томонидан пахта чигитини бир вилоятдан бошқа вилоятга олиб ўтиш тақиқланганди. Монополияга қарши курашиш қўмитасининг аралашувидан сўнг, тақиқлар олиб ташланган эди.
Изоҳ (0)