2021 йилнинг 20 декабрь куни UzAuto Motors компанияси 2022 йилнинг февралигача Nexia, Spark, Cobalt ва Lacetti автомобилларини сотиш бўйича янги аризалар қабул қилишни тўхтатган эди. Айтилган муддат, яъни 1 февраль келган бўлса-да, UzAuto Motors шартнома тузиш муддати тиклангани ёки узайтирилгани ҳақида ўз сайтида расмий хабар бермади.
Ҳолат юзасидан «Дарё» UzAuto Motors компанияси ахборот хизмати раҳбари Алексей Агуреевдан изоҳ олиш мақсадида боғланди. Аммо у нашр сўровига жавоб бермади.
«Ўзавтосаноат» компанияси ахборот хизмати раҳбари Зумрад Шожалилова «Дарё» мухбирига берган изоҳида унда ҳеч қандай маълумот йўқлиги, агар янгилик бўлса, расмий ахборот берилишини айтиш билан чекланган.
«Дарё» ҳолатга янада ойдинлик киритиш мақсадида Тошкент шаҳридаги автосалон ходими билан боғланди. Унинг айтишича, кўрсатилган автомобиллар учун шартнома тузиш қайта тикланмаган.
«Қачон қайта тикланиши бўйича бизга хабар келгани йўқ. Фақатгина Damas, Malibu, Labo, Trailblazer ҳамда Equinox учунгина шартнома тузиш мумкин», — деди автосалон ходими.
2021 йилнинг 20 декабрь куни UzAuto Motors «вақтинчалик янги автомобилга буюртма бера олмаган потенциал харидорларидан чин дилдан узр сўраган» эди.
UzAuto Motors август ойида атиги 2 дона Gentra ва бирорта ҳам Spark ишлаб чиқармаганди. Компания буни яримўтказгичларнинг глобал танқислиги ва ишлаб чиқариш босқичма-босқич трансформация қилингани билан изоҳлаб, шу доирада ягона платформадаги автомобилларни ишлаб чиқаришга ўтиш режалаштирилганини маълум қилган эди. Сентябрь охирларида эса компания Lacetti ва Spark ишлаб чиқариш тикланганини эълон қилди. Октябрь бошида эса UzAuto Motors Lacetti ишлаб чиқариш ҳажмини оширди. Октябрь охирига бориб компания Lacetti ва Лабо етказиб беришни 2 ойга кечиктирганини маълум қилди. Ноябрь охирида эса UzAuto Motors барча турдаги автомобилларини етказиб беришни 2 ойга кечиктирди.
2022 йилнинг 19 январь куни UzAuto Motors Lacetti ва Cobalt вақтинча магнитоласиз етказиб берилишини маълум қилди.
Изоҳ (0)