Фарғонадаги бозорда ёнғин чиқиб, 25 та кийим-кечак дўконига зарар етди

Фарғона вилоятининг Қува туманида жойлашган бозорда 1 февраль куни ёнғин юз берди. Бу ҳақда ФВВ матбуот хизмати хабар берди.

Маълум қилинишича, 1 февраль куни соат 06:23 да «Ғалаба» МФЙ, Бўстон кўчасида жойлашган Қува савдо комплексида (бозор) тахминан 25 та кийим-кечак дўконининг томи, шифти ва ички қисми ёнган.

Ёнғин ўчириш экипажлари воқеа жойига соат 06:27да етиб бориб, ёнғин 07:10 да қуршаб олинган ва соат 07:37 да ўчирилган. Воқеа жойига вилоят ҳамда туман ФВБлари раҳбар ходимлари ва 11 та ёнғин-қутқарув экипажи жалб этилган.

Ҳодиса оқибатида фуқароларнинг тан жароҳати олиш ва ҳалок бўлиш ҳолатлари қайд этилмаган. Ҳозирда ёнғин сабаби ва келтирилган зарар миқдори аниқланмоқда.

Аввалроқ Фарғона шаҳридаги Бозорбоши кўчасида жойлашган савдо дўконида ёнғин чиққани ҳақида хабар берилган эди.