Давлат хавфсизлик хизматининг Самарқанд вилояти бўйича бошқармаси ҳамда вилоят ИИБ ходимлари томонидан ўтказилган тезкор тадбирда маҳаллий фуқароларни АҚШга ноқонуний юборилиши билан боғлиқ ҳолатга чек қўйилди. Бу ҳақда ДХХ ахборот хизмати хабар қилди.
Қайд этилишича, тезкор тадбир давомида Самарқанд туманида яшовчи шахс (1990 йилда туғилган) 3 нафар фуқарони Ўзбекистон—Россия—Туркия—БАА—Буюк Британия—Мексика—АҚШ йўналиши орқали Қўшма штатларга юбориш учун уларнинг ҳар биридан 20 минг доллар талаб қилиб, жами 60 минг долларни олган вақтида ашёвий далиллар билан ушланди.
Текширув ҳаракатлари давомида аниқланишича, фуқароларга йўлга чиқишдан аввал уларнинг ҳар бири ПЗР тест маълумотномасига ва ҳисобида 5 минг доллар бўлган виза картага эга бўлиши кераклиги тушунтирилган.
Ҳолат юзасидан Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилиб, қонунбузарнинг хорижий давлатлардаги жиноий алоқаларига аниқлик киритиш бўйича зарур чора-тадбирлар кўрилмоқда.
Изоҳ (0)