Буюк Британия Россиянинг Украинага тажовузи юз берган тақдирда унга қарши киритиладиган санкциялар тўғрисидаги қонун лойиҳасини тайёрлади. Чекловлар «Кремль учун аҳамиятли» компаниялар ва жисмоний шахсларга таъсир қилади, дейди Буюк Британия ташқи ишлар вазири Лиз Трасс.
«Бу биз Россияга нисбатан жорий қиладиган энг оғир санкциялар режими шунингдек, Европа Иттифоқидан чиққанимиздан кейинги ёндашувимиздаги энг катта ўзгариш бўлади», — деди Трасс.
Унинг сўзларига кўра, Британия ишлаб чиқаётган санкциялар пакети 10 февралгача тасдиқланади. Лондон «Кремлнинг тажовузкор ва беқарорлаштирувчи ҳаракатларига шерик бўладиган»ларга нисбатан чекловлар қўйиш ваколатига эга бўлади.
«Уларнинг Буюк Британиядаги активлари музлатилади. Британия корхоналари ёки жисмоний шахслари улар билан битим туза олмайди», — деди Трасс. Чекловлар Буюк Британияга киришни тақиқлашни ҳам ўз ичига олади.
Лондон Москвага қарши санкцияларни кучайтиришга тайёрланаётгани ҳақида Трасс аввалроқ эълон қилганди. Унинг сўзларига кўра, қонун лойиҳаси нафақат Украинадаги вазиятга алоқадорларга, балки «россиялик олигархлар» ва «Кремлни қизиқтирадиган» ҳар қандай компанияларнинг мулкига чекловлар қўйишни назарда тутади. ТИВ раҳбари «Россия давлатининг таянчи бўлиб хизмат қилаётган» жисмоний шахслар ва корхоналар «ҳеч қаерга яширина олмайди», дея ваъда қилди.
The Times манбаларига кўра, Британия Россия энергетика компанияларига қарши санкциялар жорий қилиши мумкин. Чекловлар иқтисодиётнинг бошқа тармоқларига ҳам таъсир кўрсатиши истисно қилинмаяпти, деб ёзади газета.
Россия президенти матбуот котиби Дмитрий Песков Буюк Британиядаги Россия бизнесига қарши санкциялар таҳдиди халқаро молия ва бизнес тузилмаларини хавотирга солаётганини айтди. У «Россия бизнесига ҳужум» қилинган тақдирда, Москва жавоб чораларини кўришига ваъда берди.
Изоҳ (0)