Ўзбекистонда халқ депутатлари кенгашларининг ижтимоий-иқтисодий масалаларни ҳал қилишдаги ваколатларини янада кенгайтириш режалаштирилмоқда. Бу ҳақда «Янги Ўзбекистоннинг 2022–2026 йилларга мўлжалланган тараққиёт стратегияси тўғрисида»ги президенти фармонидаи сўз боради.
Ҳужжатга кўра, ичимлик ва оқова сув, ички йўллар, бошқа инфратузилма объектларини қуриш, бандлик дастурларини тасдиқлашни туман ва шаҳар халқ депутатлари кенгашлари ваколатига ўтказиш мўлжалланган. Шунингдек, ҳудудларда давлат таълим муассасалари, соғлиқни сақлаш объектларини қуриш ва таъмирлашга ажратиладиган маблағларни тақсимлаш ваколати вилоятлар ва Тошкент шаҳар халқ депутатлари кенгашларига ўтказилади.
Ҳудудларни комплекс ижтимоий ривожлантиришга масъул бўлган давлат органлари фаолиятини мувофиқлаштириш ва тартибга солиш тизимини қайта кўриб чиқиш ҳам режалаштирилган. Маҳаллий кенгашларнинг назорат функцияларини кенгайтириш, уларни тизимлаштириш мақсадида «Халқ депутатлари кенгашлари назорати тўғрисида»ги қонун лойиҳаси ишлаб чиқилади.
Туман ва шаҳар халқ депутатлари кенгашларида камида 2-3 нафар депутат доимий асосда ишлайдиган тартиб жорий этилади. Маҳаллий кенгашлар фаолиятининг ҳуқуқий асосларини янада такомиллаштиришга қаратилган «Халқ депутатлари вилоят, туман, шаҳар кенгашлари регламенти тўғрисида»ги қонун лойиҳаси ишлаб чиқилади.
Аввалроқ «Янги Ўзбекистоннинг тараққиёт стратегияси» ва уни 2022 йилда амалга оширишга оид давлат дастури тасдиқлангани тўғрисида хабар берилганди. Фармонда Ўзбекистонни кейинги 5 йилда ривожлантиришнинг 7 та устувор йўналиши доирасида 100 та мақсадларга эришишга қаратилган ва 2022 йилда амалга оширилиши лозим бўлган 398 та чора-тадбирлар назарда тутилган.
Режалаштирилаётган чора-тадбирларни молиялаштиришга 2022 йилда умумий қиймати 55 триллион сўм ва 11,7 миллиард доллар миқдоридаги маблағлар ажратилиши режалаштирилган.
Изоҳ (0)