Андижон вилояти соғлиқни сақлаш бошқармаси автокорхонаси томонидан тез тиббий ёрдам бўлимларида коронавирусга чалинган беморларга ёрдам кўрсатувчи бригадаларда ишлаган 770 нафар ҳайдовчига тўланмаётган рағбатлантириш пулларининг бир қисми тўлаб берилди. Бу ҳақда «Дарё» мухбири хабар берди.
Вилоят адлия бошқармаси инсон ҳуқуқларини ҳимоя қилиш бўлими бошлиғи Муҳаммадзокир Маҳсудовнинг маълум қилишича, Андижон вилояти соғлиқни сақлаш бошқармаси автокорхонасининг Андижон шаҳар тез тиббий ёрдам бўлимига бириктирилган, коронавирус инфекцияси билан касалланган ёки гумон қилинган беморларга тез ёрдам кўрсатувчи бригадалар таркибида ишлаган бир гуруҳ ҳайдовчилар моддий рағбатлантириш пуллари тўланмаётганидан норози бўлиб жамоавий мурожаат қилган.
Ўрганиш жараёнида, Вазирлар Маҳкамасининг 2020 йил 24 сентябрдаги «Ўзбекистон Республикасида коронавирус инфекцияси тарқалишининг олдини олиш тадбирларига ажратилаётган маблағларнинг самарадорлигини таъминлашга оид қўшимча чора-тадбирлар тўғрисида»ги қарорига асосан тез тиббий ёрдам бригадалари таркибиди бўлган ҳайдовчиларга 1 миллион сўмдан ҳар ойлик моддий рағбатлантириш тўловлари тўлаб берилиши белгиланган бўлсада, қарор ижроси таъминланмагани аниқланган.
Аниқланган ҳолатлар юзасидан автокорхона раҳбариятига қонун ҳужжатларининг бузилиши, уларнинг сабаблари ва бунга олиб келувчи шарт-шароитларни бартарф етиш юзасидан бажарилиши мажбурий бўлган тақдимнома киритилган. Унга асосан автокорхона масъул ходимлари томонидан вилоятда коронавирус инфекцияси билан касалланганлик ёки гумон қилинган беморларга тез тиббий ёрдам кўрсатган бригадаларда фаолият юритган ҳайдовчиларга тўланиши лозим бўлган моддий рағбатлантириш пуллари ҳисобланганда жами қарздорлик, 1,3 миллиард сўмдан зиёдни ташкил этган.
Талабномага асосан 770 нафар ҳайдовчига вилоят молия бош бошқармаси томонидан ажратилган 700 миллион сўм пул маблағлари тўлаб берилиши таъминланган. Шунингдек, яна ажратилиши кутилаётган 700 миллион сўмдан ортиқ маблағлар автокорхона ҳисоб рақамларига келиб тушиши билан тўлаб берилиши маълум қилинган.
Маълумот учун, Ўзбекистонда коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Изоҳ (0)