2022—2026 йилларга мўлжалланган Тараққиёт стратегиясини амалга ошириш доирасида республикадаги камбағаллик даражасини икки баравар қисқартириш режалаштирилмоқда. Бу ҳақда 28 январь куни Бош вазир ўринбосари, иқтисодий тараққиёт ва камбағалликни қисқартириш вазири Жамшид Қўчқоров Шанхай ҳамкорлик ташкилотига аъзо давлатлар вазирлик ва идоралари раҳбарларининг онлайн йиғилишида маълум қилди, дея хабар бермоқда «Дарё» мухбири.
Жамшид Қўчқоровнинг айтишича, камбағалликни қисқартиришга қаратилган давлат дастурлари ишлаб чиқилади.
«Дастур асосида норасмий ишлаётган 2,5 миллион нафар фуқаро бандлиги легаллаштирилади, уларда ижтимоий кафолат ва имтиёзлардан тўлиқ фойдаланиш имконияти яратилади. Шунингдек, аёллар орасидаги ишсизлик даражасини 2 марта камайтириш, 700 мингдан зиёд ишсиз хотин-қизларни давлат ҳисобидан касб-ҳунарга ўқитиш кўзда тутиляпти. Имконияти чекланган ва ногиронлиги бўлган шахсларнинг бандлигини 3 баравар ошириш режалаштирилмоқда. Республикада камбағалликни қисқартириш ишлари 3 та асосий йўналишда: соғлиқни сақлаш ва ижтимоий ҳимоя тизимларини мустаҳкамлаш ҳамда иқтисодиётнинг реал секторидаги корхоналарни қўллаб-қувватлаш орқали амалга оширилади», — деди бош вазир ўринбосари.Иқтисодиёт вазирининг қўшимча қилишича, 2020—2021 йилларда давлат бюджети ҳисобидан нафақа оладиган оилалар сони 2 баробарга ошди ва уларнинг улуши қарийб 15 фоизга етган.
«Камбағаллик даражасини белгилашда янги мезон — минимал истеъмол харажатлари жорий этилди. Бу ижтимоий тўловлар ва имтиёзларнинг минимал даражасини қайта кўриб чиқишга имкон берди. Масалан, 2021 йилда имконияти чекланган инсонлар учун энг кам пенсия ва нафақа турлари, шунингдек, боқувчисини йўқотган оилаларга бериладиган нафақалар миқдори 10 фоиздан 50 фоизгача оширилди», — деди у.Иқтисодиёт вазирлигининг «Дарё»га маълум қилишича, 2021 йилда жорий этилган маҳаллаларда ҳоким ёрдамчиларининг вазифаси — аҳолини тадбиркорликка жалб этиш, бандлигини таъминлаш орқали камбағалликни қисқартиришдан иборат.
«Бу мақсадлар учун 2022 йилда давлат бюджетидан 12 триллион 500 миллиард сўм маблағ сарфланиши режалаштирилган», — дейилади вазирлик маълумотида.
Аввалроқ Ўзбекистоннинг тараққиёт стратегияси бўйича президент фармони имзолангани хабар қилинганди. Ҳужжатда 2026 йилгача эҳтиёжманд аҳоли ижтимоий нафақа ва моддий ёрдам билан тўлиқ қамраб олиниши белгиланган. Шу билан бирга, пенсияни ҳисоб-китоб қилиш учун ўртача иш ҳақининг максимал миқдорини пенсияни ҳисоблаш базавий миқдорининг 10 бараваридан 12 бараваригача ошириш кўзда тутилган.
Эслатиб ўтамиз, президент Шавкат Мирзиёев 2020 йил бошида мамлакатда камбағаллик даражаси 12—15 фоиз атрофида эканини айтганди.
«Гап 4-5 миллион аҳоли вакиллари ҳақида кетяпти. Бу — жуда катта рақам», — деган эди давлат раҳбари Олий Мажлисга мурожаатида.
Изоҳ (0)