Ўзбекистон миллий терма жамоасидаги коронавирус билан боғлиқ вазият борасида маълумот берилди.
Фото: ЎФА
Дубайдаги йиғинда иштирок этаётган Ўзбекистон миллий терма жамоаси аъзолари навбатдаги ПЗР-тестларини топширган. Унга кўра, Абубакр Ризо Турдиалиевда коронавирус аниқланган. Футболчи ҳозирда ўзини яхши ҳис қилмоқда ва бошқа симптомлар кўзга ташланмаяпти. Турдиалиев бир неча кундан сўнг қайта тест топширади.
Аввалроқ Иброҳимхалил Йўлдошев ва Одилжон Ҳамробековда Covid-19 аниқланган эди. Уларнинг қайта топширган тест натижалари манфий чиққан. Шифокорлар кўригидан сўнг иккала футболчига ҳам карантиндан чиқишга ва машғулотларни давом эттиришга рухсат берилган.
Эслатиб ўтамиз, Ўзбекистон терма жамоаси мазкур йиғин доирасида 23 январь куни «Ал-Ваҳда» жамоаси билан ўртоқлик ўйини ўтказиб, 1:0 ҳисобида ғалаба қозонди. 27 январь, пайшанба куни эса Жанубий Судан 3:0 ҳисобида таслим этилди. Шунингдек, Дубайдаги йиғин доирасида 1 февраль куни Янги Зеландияга қарши ўртоқлик ўйини ўтказилиши режалаштирилган.
