Rossiya Ukrainaga hujum qilishga tayyor, biroq hali buni amalga oshirish bo‘yicha qaror qabul qilmagan. Bu haqda Germaniya Federal razvedka xizmati (BND) rahbari Bruno Kal Reuters’ga bergan intervyusida ma’lum qildi.
“Men hujum bo‘yicha qaror hali qabul qilinmagan deb hisoblayman. Inqiroz minglab usullar bilan rivojlanishi mumkin”, — deydi u. Kal Rossiya “bosqini” yuz bergan taqdirda qanday sanksiyalar qo‘llanilishi to‘g‘risidagi savolga javob berishni istamagan, biroq Moskvani imkon qadar cheklovchi choralar bilan uzoqda ushlab turish bo‘yicha Germaniya yondashuvini qo‘llab-quvvatlagan.
G‘arb Rossiyaga Ukrainaga nisbatan “bosqinchlik” harakatlarini tayyorlayotganini ta’kidlab kelmoqda. Yanvar o‘rtalarida Oq uy matbuot kotibi Jen Psaki Rossiya Ukrainaga bostirib kirish uchun asos yaratayotganini ma’lum qilgandi. Uning so‘zlariga ko‘ra, yanvar-fevral oylarida sodir bo‘lishi mumkin, tajovuzkor harakatlar uchun sabab uyushtiriladi.
Moskva bu ma’lumotlarni rad etib, Ukrainadagi harbiy harakatlarga tayyorgarlik haqidagi xabarlarni “quruq, asossiz keskinlik” deb atamoqda. Qolaversa, Rossiya g‘arb davlatlaridan NATOning sharqqa tomon kengaymasligi, Ukraina esa bu tashkilotga qabul qilinmasligi haqida kafolat talab qilgan.
Avvalroq Zelenskiy AQSh davlat kotibi bilan uchrashuvda Ukraina armiyasini modernizatsiya qilishda yordam so‘ragani, Kanada maxsus kuchlarining bir qismi Ukrainaga jo‘natilgani to‘g‘risida xabar berilgandi. Shuningdek, NATO Ukraina yaqinida Rossiya kuchlari to‘planayotgani sabab o‘z qurolli kuchlarini jangovar shay holatga keltirayotgani va Sharqiy Yevropaga qo‘shimcha kema hamda qiruvchi samolyotlarni yuborgani ma’lum bo‘lgandi.
Izoh (0)