Халқ таълими тизимида маълумотлар алмашувини автоматлаштириш ва бошқариш мақсадида ягона дастурий комплекс — ERP ахборот тизими ишлаб чиқилиб, амалда кенг жорий этиш бўйича ишлар амалга оширилмоқда, деб хабар берди Халқ таълими вазирлиги.
Enterprise Resource Planning – ташкилот ёки муассасанинг мавжуд бўлган ресурслари ҳамда жараёнларни режалаштириш ва бошқариш деган маънони англатади.
Халқ таълими тизимида бу тизим амалдаги жараёнларни автоматлаштириш, ҳужжат алмашинувларини электронлаштириш, тизим ходимларига рақамлаштириш орқали қатор енгилликлар яратиш, давлат бюджет маблағлари ортиқча сарфланишининг олдини олиш, инсон омилини камайтириш, иш ҳақи ва унга тенглаштирилган тўловларни тўлаш жараёнида юзага келиши мумкин бўлган хато ва камчиликларни бартараф этиш ҳамда маълумот алмашинувида шаффофликни таъминлаш мақсадида жорий этилмоқда.
Маълум қилинишича, ERP платформаси 1-синфга қабул жараёнида ўқувчилар рўйхатини электрон шакллантириш, ўқув соатларини белгилаш, педагогларга соат бириктириш, малака тоифаларини мониторинг қилиш, ходимларга иш ҳақини белгилаш, табел ҳисобини олиб бориш каби бир қатор қулайликларни тақдим этади.
Халқ таълими вазирлиги мутасаддилари, умумтаълим мактаблари бошқарув ходимлари дастурий мажмуанинг асосий фойдаланувчилари ҳисобланади. ERP тизими бошқа вазирлик ва давлат идораларининг ахборот тизимлари ҳамда маълумот базалари билан интеграция қилинмоқда.
«Бугунги кунда халқ таълими тизимидаги 10 мингдан ортиқ умумтаълим мактабларини ERP’га улаш бўйича ишлар олиб борилмоқда. Эндиликда мазкур мактаблардаги 700 мингдан ортиқ ходим ва 6,2 миллион нафардан зиёд ўқувчига оид маълумотларни ушбу платформа орқали онлайн юритилиши тўлиқ йўлга қўйилади», — дейилади хабарда.
Аввалроқ Ўзбекистонда келгуси беш йилда мактабларда қўшимча 1,2 млн ўқувчи ўрни яратилиб, дарсликлар янгилангани, Ўзбекистонда ҳар йили мактабларда хорижий тилларни ривожлантириш учун бюджетдан камида 1 млрд сўм ажратилиши тўғрисида хабар берилганди.
Изоҳ (0)