Қозоғистон электр тармоқларини бошқариш компанияси 2022 йил 25 январь куни Ўзбекистон, Қозоғистон ва Қирғизистонда кузатилган электр таъминотидаги йирик узилишларнинг сабабини маълум қилди, деб ёзмоқда Tengrinews.
«Ўзбекистонда 2022 йил 25 январь куни Нур-Султон вақти билан соат 11.59 да (Тошкент вақти билан 10.59) Сирдарё ИЭСда юз берган қисқа туташув туфайли 6 та энергоблок ўчиб, умумий ишлаб чиқариш қуввати 1500 МВт.дан ортиқ йўқотилган. Ўзбекистон энергетика тизимида юзага келган электр қуввати тақчиллиги Қозоғистон энергетика тизимидан Ўзбекистон ва Қирғизистон энергетика тизимлари билан параллел ишлашга уланган электр энергиясинининг беихтиёр узилишига олиб келган. Натижада, 500 киловолтлик «Шимолий-Шарқий-Қозоғистон жануби» транзити учун электр қувватининг кўтарилиши, унинг ортиқча юкланиши кузатилган», — дейилади компания баёнотида.
Қайд этилишича, Ўзбекистон ва Қирғизистоннинг энергетика тизимлари тўлиқ ишдан чиққан, барча электр станциялари ва истеъмолчилар таъминоти тўхтатилган. Ўзбекистон энергетика тизимида узилган юкланиш тахминан 9600 МВт (истеъмолнинг 100 фоизи), Қирғизистонда 2600 МВт (истеъмолнинг 100 фоизи)ни ташкил этган.
Шунингдек, компания баёнотида электр таъминотидаги узилишлар криптовалюта майнерларининг фаолияти билан боғлиқ эмаслиги қайд этилган.
«KEGOC маълумотларига кўра, тақчилликнинг асосий омиллари электр станцияларида аварияга мойилликнинг юқорилиги ва электр энергияси истеъмолининг сезиларли ўсиши бўлиб, ўтган йил давомида ушбу кўрсаткич 6 фоиздан ошди, бу сўнгги йилларга нисбатан 3 баробар кўпдир. Электр энергияси тақчиллиги шароитида KEGOC электр станциялари ва энергия таъминоти ташкилотлари билан биргаликда майнинг маълумот марказларига режалаштирилган электр энергиясини етказиб беришни қисқартириш чораларини кўрди», — дейилади хабарда.
Қозоғистон муаммо ҳақида аввалдан билган
Тасдиқланган маълумотларга кўра, Қозоғистонда катта авария содир бўлиши мумкинлиги ҳақида ахборотлар бўлган, бироқ ҳукумат ушбу муаммолар ҳақида тегишли томонлар (Ўзбекистон ва Қирғизистонни) огоҳлантирмаган. Баъзи мутахассислар ҳам Қозоғистонда энергетика инфратузилмасини ривожлантириш ва бугунги кундаги стандартларга мослаштириш учун етарлича эътибор қаратилмаганини таъкидлаган.
Ўзбекистон Энергетика вазирлиги матбуот хизмати хабар беришича, ҳукумат комиссияси ҳодиса сабабларини ўрганишда давом этмоқда.
«Юзага келган вазият муносабати билан Ўзбекистон президенти топшириғига биноан ҳодиса сабабларини ўрганиш бўйича мамлакат бош вазири бошчилигида ҳукумат комиссияси тузилди. Комиссия ишининг натижалари расман эълон қилинади», — дейилади Энергетика вазирлиги хабарида.
Изоҳ (0)