Ўзбекистонда 2022 йилнинг 25 январь ҳолатига кўра, ис гази билан боғлиқ 16 та ҳолат қайд этилган. Бу ҳақда АОКАда ўтказилган ФВВ, ИИВ, Саноат хавфсизлиги давлат қўмитаси, Техник жиҳатдан тартибга солиш агентлиги мутасаддилари иштирокидаги матбуот анжуманида айтиб ўтилди.
Қайд этилишича, 16 та ҳолатда 9 нафар фуқаро заҳарланиб, 28 нафари вафот этган. 2021 йилда ис гази билан боғлиқ жами 74 та ҳолат аниқланган. Уларда 67 нафар фуқаро заҳарланган ва 128 нафар фуқаро вафот этган.
Таҳлилларга кўра, ис газидан заҳарланиш ҳолатларининг аксарияти қуйидаги сабабларга кўра юзага келмоқда:
- фуқаролар томонидан газ ва муқобил ёқилғи (кўмир, ўтин ва бошқа) турларидан фойдаланишда хавфсизлик чораларига риоя этмаслик;
- ностандарт (қўлбола ясалган) ёки сертификатга эга бўлмаган иситиш печлари ва анжомларидан фойдаланиш;
- иситиш печларининг дудбуронларини нотўғри ўрнатиш;
- газ ёки бошқа муқобил ёқилғига мослаштирилган иситиш печлари (анжомлари)ни дам олиш (ухлаш) хоналарига олиб кириш;
- ҳаво алмашмайдиган хоналарни иситишда очиқ олов (кўмир ва ўтин чўғлари)дан фойдаланиш;
- ҳавони алмаштирувчи шамоллатиш шахталари ёки туйнукларни беркитиб (тўсиб) қўйиш шулар жумласидан.
Эслатиб ўтамиз, 2020–2021 йилги қиш мавсумида Хоразмда 31 ёшли аёл ва унинг 10 ёшли қизи, Қорақалпоғистонда бир оиланинг 4 нафар аъзоси ва 2 нафар меҳмон ҳамда Сирдарёда 31 ёшли аёл ва унинг вояга етмаган 3 нафар фарзанди ис газидан заҳарланиб вафот этгани ҳақида хабар берилганди. Шунингдек, Навоийда икки нафар ака-ука ис газидан заҳарланиб вафот этгани, Самарқандда қўлбола печдан ис гази сизиб чиқиши оқибатида ёш эр-хотин вафот этгани ҳақида хабар берилган, кейинроқ улар икки кун аввал турмуш қургани маълум бўлганди.
Мавзуга доир:
Изоҳ (0)