Ижтимоий тармоқларда Урганчда янги туғилган чақалоқ чиқиндига ташлаб кетилгани айтилган видео тарқалди. Хоразм вилояти прокуратураси мазкур ҳолат юзасидан маълумот берди.
Аниқланишича, 2022 йил 1 январь куни Урганч шаҳар Амир Темур ва Гурлан кўчалари ўртасида жойлашган чиқинди ташлаш жойидан ўлик ҳолатда, етилмаган, қиз жинсига мансуб чақалоқ мурдаси топилган.
Мазкур ҳолат юзасидан Урганч шаҳар прокуратураси томонидан ўтказилаётган терговга қадар текширув ўтказилган. Республика суд-тиббий экспертизаси илмий-амалий маркази Хоразм филиалининг 2-сонли хулосасида шахси номаълум қиз жинсига мансуб чақалоқнинг ўлимига етилмаганлик ва ҳаётга лаёқатсизлик сабаб бўлгани кўрсатилган.
Шунингдек, эксперт хулосасига кўра, чақалоқ она қорнида 5,5—6 ой яшаган бўлиши мумкинлиги, чақалоқ мурдасида тан жароҳатлари аниқланмагани, чақалоқнинг мурдасидан олинган қон ва ҳомила йўлдошида ҳомиладорликни жарроҳлик аралашувисиз эрта тугатишда қўлланиладиган синтетик препарат «мифепристон» дори воситаси қолдиқлари топилган.
Текширув давомида чақалоқнинг онаси аниқланмаган.
Ҳозирда терговга қадар текширув Урганч шаҳар прокуратураси томонидан давом эттирилмоқда, текширувнинг бориши вилоят прокуратураси томонидан назоратга олинган.
Аввалроқ Фарғонада 20 ёшли қиз кўчадан чақалоқ топиб олганини айтиб ИИБга мурожаат қилгани, суриштирув натижасида чақалоқни унинг ўзи дунёга келтиргани аниқлангани ҳақида хабар берилганди.
Изоҳ (0)