Видео: Афғонистондан 30 йил олдин Термизга олиб кирилган 13 тоннадан ортиқ наркотик моддалар

Давлат божхона қўмитаси 1992−1994 йилларда қўмитанинг Сурхондарё вилояти бошқармаси томонидан қарийб 15,5 тоннадан ортиқ гиёҳвандлик воситалари тўхтатиб қолингани акс этган видеотасвирларни эълон қилди.

Маълум қилинишича, эълон қилинган лавҳалар ўша йилларда Давлат божхона қўмитасининг Сурхондарё вилояти бошқармасига раҳбарлик қилган Холдор Шеровнинг шахсий архивидан олинган. Юк ортилган контейнерлар Афғонистон ҳудудидан дарё порти орқали кемаларда Ўзбекистонга кириб келган.

1992 йил 8 октябрда майиз ортилган контейнер ичида 13 тоннадан ортиқ гашиш яширилгани аниқланган. Ушбу гиёҳвандлик воситаларининг қора бозордаги нархи ўша вақтларда 1,3 миллиард долларни ташкил қилган.

«5 октябрь куни бизнинг ходимларимиз текшириб кўрганида майиз деб ёзилган контейнерда 2560 дона қутида ҳаммаси бўлиб, 32 тонна юк борлиги аниқланди. Қутилар бир хил бўлишига қарамасдан, 1305 дона қутида наркотик моддалар бор экан. Қолганида 1255 қутида майиз бор экан», — дейди видеода Холдор Шеров.

1993 йил 16 февралида эса ёнғоқ ортилган 2 та темир йўл контейнерда 1167 килограмм гашиш яширилгани фош қилинган. Шу йили Сурхондарёда авторефрижераторнинг том қисмига яширилган 1,2 тонна героиннинг олиб ўтилишининг олди олинган.

Аввалроқ Давлат хавфсизлик хизматининг Фахрийлар кенгаши раиси ўринбосари, Ўзбекистонда хизмат кўрсатган юрист, истеъфодаги полковник Эркин Абдуллаев 1992 йилда анча шов-шувга сабаб бўлган мазкур жиноят иши тафсилоти билан бўлишганди. Абдуллаевнинг сўзларига кўра, 1993 йилнинг ёзига келиб, майизлар орасига яширилган гиёҳванд моддаларга оид жиноий иш бўйича дастлабки тергов ишлари тўхтатилган. 1994 йилда халқаро ташкилотлар ва оммавий ахборот воситалар вакиллари иштирокида 13 тонна 50 килограмм гашиш ёқиб юборилган. 1998 йилда АҚШ М.Юсуф ва М.Юнусни қўлга олган. Сан-Франциско шаҳрида бўладиган суд жараёнида Эркин Абдуллаев ҳам иштирок этиши режалаштирилган эди. Айрим мулоҳазаларга кўра, у Америкага боролмаган.

«Дарвоқе, америкаликлар 1992 йилги Термиз воқеасини ‘Гиннесс рекордлари китоби'га киритиш тўғрисида тақдимнома киритишга ваъда берган эди. Афсуски, бу қуруқ гап бўлиб қолиб кетган», — дея таъкидлайди у.