Украина президенти Владимир Зеленский фуқароларга мурожаат билан чиқиб, яна бир бор ваҳимага тушмасликка чақирди. Давлат раҳбарининг мамлакат Миллий хавфсизлик ва мудофаа кенгаши йиғилишидан кейин қилган баёнотидан парчалар унинг Telegram’даги каналида эълон қилинган.
Унинг сўзларига кўра, мамлакат шарқидаги вазият назорат остида, «ваҳимага ўрин йўқ».
«Биз вазиятни тинч йўл билан тартибга солиш орқали кескинликни тўлиқ юмшатиш устида ишлаяпмиз. Барчасидан хабардор бўлган ҳолда ҳаммасига тайёрмиз, биз энг яхшисига ишонамиз ҳамда шерикларимиз, дипломатларимиз ва ҳарбийларимиз билан биргаликда зарур барча нарсани қиляпмиз. Улар бизни ҳимоя қиляпти, биз эса уларни ҳимоя қилишимиз керак», — дейди Зеленский ўз мурожаатида.
Давлат раҳбари тинчлик сақлаб, «тўғри келган гапни айтавермасликни» сўраган. Иситиш мавсуми ҳақида гапирар экан президент газ ва кўмир захираси етарли эканини билдирган.
Шунингдек, Украина етакчиси коронавирус пандемияси мавзусига ҳам тўхталиб ўтган. Унинг сўзларига кўра, касалланиш ҳолатлари ортиб бораётганига қарамай, шифохоналарнинг 28 фоизининггина койкалари банд. У вакцинанинг учинчи — бустер дозаси билан эмланганларга 500 гривнада (17,6 доллар) ваъда қилган.
Зеленский аввалроқ ҳам Россиянинг эҳтимолий босқини сабаб украиналикларни ваҳимага тушмасликка чақирган эди. «Уруш саккиз йилдан бери давом этяпти, ҳозир ваҳима қилиш, вазиятни кескинлаштириш, гречка ва гугурт сотиб олиш вақти эмас», — дейди у.
Аввалроқ НАТО Украина атрофидаги вазият сабаб қўшинларини жанговар шай ҳолатга келтириши, АҚШ Давлат департаменти Киевдаги дипломатларнинг оилаларини эвакуация қилишни бошлагани, АҚШ Украинага яна 80 тонна қурол-яроғ етказиб бергани тўғрисида хабар берилганди.
Изоҳ (0)