Ўзбекистоннинг қатор вилоятларида 25 январь куни соат 11:00 ларда электр энергияси таъминоти узилгани хабар қилинганди. Электр энергияси таъминотидаги узилиш сабабли «Ўзбекнефтгаз» АЖга қарашли корхоналарда қурилмалар ҳамда станциялар фаолияти вақтинча тўхтади.
Қайд этилишича, «Ўзбекнефтгаз» тасарруфида бўлган Газли, Шўртан ва Муборак НГҚЧБлардаги 64 та кон вақтинча фаолиятини тўхтатди, Устюрт ГҚЧБда муқобил электр энергияси мавжудлиги сабабли ишламоқда.
Ишлаб чиқариш билан боғлиқ бўлган корхоналардан Бухоро нефтни қайта ишлаш заводи, 3 та газни қайта ишловчи завод (Муборак газни қайта ишлаш заводи, Шўртан газ-кимё мажмуаси ва Uzbekistan GTL фаолиятини тўхтатди ва электр энергия берилиши билан уларни иш режимига тушириш графиклари ишлаб чиқилди ҳамда вақтинчалик штаб ташкил этилди.
Иқтисодиёт тармоқлари ҳамда аҳолига суюлтирилган газ ва нефть маҳсулотларини узлуксиз етказиб берилмоқда, айни вақтда узилишлар мавжуд эмас.
14 та нефть базада ва Тошкент шаҳрида дизель ёқилғиси ва бензин маҳсулотларини тизимли етказиб берилмоқда, 29 та мобил ёқилғи қуйиш шохобчалари иш фаолиятини бошлади.
Бундан ташқари, нефть базаларга барча корхона ва ташкилотларга кечаги кунги ўртача биржа нархидан келиб чиқиб бензин ва дизель ёқилғисини тўғридан-тўғри сотиш топшириғи берилди. Бугунги кунда 47 минг тонна бензин (20 кунлик), 144 минг тонна (4 ойлик) дизель ёқилғиси захираси мавжуд.
Шунингдек, соғлиқни сақлаш муассасалари алоҳида назоратга олиниб, қаерда дизель ёқилғисида узилишлар бўлса, нефть базалар узлуксиз етказиб берилиши чоралари кўрилган.
«Ўзбекнефтгаз» АЖ, «Ҳудудий электр тармоқлари» АЖ ҳамда «Ўзбекистон Миллий электр тармоқлари» АЖнинг тегишли мутахассислари ҳамкорлигида юзага келган ҳолатни бартараф этиш бўйича тезкор ишлар амалга оширилмоқда.
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилмоқда.
Энергетика вазирлиги маълумотларига кўра, ҳозирда Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган. «Дарё» нашри ходимлари ва ўқувчиларининг хабар беришича, Тошкент шаҳрининг айрим ҳудудларида электр таъминоти тикланмоқда.
Изоҳ (0)