Айрим ижтимоий тармоқларда «Ўзбекистонда 3 кун электр энергияси бўлмайди» сарлавҳаси остида хабарлар тарқалмоқда. Энергетика вазирлиги ҳолатга муносабат билдириб, ушбу хабарлар мутлақо асоссиз эканини маълум қилди.
Таъкидланишича, ҳозирги вақтда республика ҳудудларида электр энергияси таъминоти босқичма-босқич тикланмоқда.
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилмоқда.
Энергетика вазирлигининг маълум қилишича, Қозоғистон электр тармоғида катта авария бўлиши оқибатида Олмаота, Чимкент, Тарас, Туркистон (вилоятларида) ва атроф ҳудудларида электр энергияси таъминотида ўчишлар юзага келган. Вазирлик маълумотларига кўра, ҳозирда Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган. «Дарё» нашри ходимлари ва ўқувчиларининг хабар беришича, Тошкент шаҳрининг айрим ҳудудларида электр таъминоти тикланмоқда.
Изоҳ (0)