Тошкент шаҳар ҳокимлиги пойтахтда фаолият юритаётган корхона, ташкилот ва муассасалар раҳбарларига мурожаат билан чиқиб, ходимларига навбати билан уйга жавоб беришларини сўради.
Таъкидланишича, шаҳар кўчаларидаги светофорлар ишида носозликлар кузатилмоқда. Ҳозирда юқоридаги носозликларни бартараф этишга барча кучлар сафарбар этилган. Пойтахт ҳокимлиги ҳузуридаги Вазиятлар марказида туну кун ишлайдиган махсус тезкор штаб фаолияти йўлга қўйилган.
«Шу сабабли бир вақтнинг ўзида катта тирбандликнинг олдини олиш мақсадида корхонангизда фаолият юритаётган ходимларга 15:30 дан кейин жадвал асосида жавоб беришингизни тавсия қиламиз. Шаҳримиз аҳолиси ва меҳмонларидан вужудга келган вазият учун узр сўраймиз ва вазиятни тўғри қабул қилишингизга умид қиламиз», — дейилади мурожаатда.
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилмоқда.
Энергетика вазирлиги маълумотларига кўра, ҳозирда Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган. «Дарё» нашри ходимлари ва ўқувчиларининг хабар беришича, Тошкент шаҳрининг айрим ҳудудларида электр таъминоти тикланмоқда.
Изоҳ (0)