Тошкентда электр энергияси таъминотида узилишлар кузатилаётгани боис 25 январь куни пойтахт метрополитенининг айрим йўналишлари бўйлаб автобуслар қатнови йўлга қўйилади. Бу ҳақда «Тошшаҳартрансхизмат» хабар берди.
Маълум қилинишича, «Тошшаҳартрансхизмат» таркибидаги MAN RR3 (сайёҳлик) русумли автобуслар ажратилган бўлиб, улар Буюк ипак йўли ва Олмазор йўналиши бўйича метрополитеннинг барча станцияларида тўхтаб ўтиш асосида йўловчиларга транспорт хизматларини кўрсатади.
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилмоқда.
Энергетика вазирлиги маълумотларига кўра, ҳозирда Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган. «Дарё» нашри ходимлари ва ўқувчиларининг хабар беришича, Тошкент шаҳрининг айрим ҳудудларида электр таъминоти тикланмоқда.
Изоҳ (0)