Қарши давлат университетида кўплаб дарахтларнинг кесиб ташлангани ҳолати вилоят прокуратураси томонидан ўрганилмоқда. Бу ҳақда Бош прокуратура матбуот хизмати хабар берди.
Университет ҳудудидаги дарахтлар кесилгани ҳақидаги хабар 11 январь куни ижтимоий тармоқларда тарқалганди. Экология ва атроф-муҳитни муҳофаза қилиш давлат қўмитаси мазкур ҳолат юзасидан 13—15 январь кунлари ўрганиш ишларини олиб борганини эълон қилди.
Маълум қилинишича, Қарши давлат университети томонидан Ягона давлат интерактив хизматлари портали орқали давлат ўрмон фондига кирмайдиган дарахтларни кесиш учун уч маротаба мурожаат қилинган. Қашқадарё вилояти Экология ва атроф-муҳитни муҳофаза қилиш бошқармаси томонидан мазкур мурожаатларга рад жавоби берилган. Шунга қарамай, университет ҳудудидаги жами 38 туп дарахт ноқонуний кесилгани аниқланган.
Мазкур қонунбузарлик ҳолати бўйича ўсимлик дунёсига етказилган зарар 267,5 миллион сўм миқдорида ҳисобланган.
Бош прокуратура матбуот хизмати хабарида таъкидланишича, ўрганиш натижаси юзасидан маълумот берилади.
Эслатиб ўтамиз, давлат ўрмон фондига кирмайдиган дарахтлар ва буталар қимматбаҳо навларининг кесилишига мораторийнинг амал қилиши президент фармони билан муддатсиз даврга узайтирилган.
Аввалроқ Андижонда 12 туп дарахт ноқонуний кесилгани юзасидан жиноят иши қўзғатилгани, Юнусободда қурилиш режалаштирилган ҳудуддаги 10 та қарағай арралаб кетилгани бўйича жиноят иши қўзғатилгани, Тошкентда 81 та дарахтнинг кесилишига оид тергов иши қайта тиклангани ҳақида хабар берилганди.
Изоҳ (0)