Туризм ва спорт вазирлиги ҳузуридаги Маданий мерос агентлиги директори Шаҳриёр Нуруллоев 24 январь куни Япония халқаро ҳамкорлик агентлиги (JICA)нинг Ўзбекистондаги ваколатхонаси директорининг биринчи ўринбосари Йошимаса Такемура вакиллари билан учрашди. Бу ҳақда агентлик ахборот хизмати хабар қилди.
Қайд этилишича, учрашув белгиланган топшириқлар ижросини таъминлаш, хусусан, Ўзбекистонда Буюк Ипак йўли маданий мерос архивларини сақлаш ва рақамлаштириш ҳамда икки мамлакат ўртасида маданий меросни асраш йўналишида ҳамкорлик алоқаларини мустаҳкамлаш мақсадида ташкил этилган.
Ўрганиш натижаларига кўра, 2021 йил 29 октябрь куни Маданий мерос агентлигида «Ипак Йўли маданий меросини рақамли архивлар орқали сақлаш» лойиҳасининг дастлабки муҳокама йиғилиши бўлиб ўтган.
2022 йилнинг январь ойида Маданий мерос агентлигида директор Шаҳриёр Нуруллоев JICA ваколатхонаси раҳбарининг биринчи ўринбосари Ёшимаса Такемура билан ўтказган учрашувида лойиҳага Япония томонидан 55.9 млн иена (490 минг АҚШ доллари) ажратилгани маълум қилинган.
Учрашув якунида томонлар лойиҳа ҳужжатларини Ўзбекистон ва Япония ўртасида дипломатик алоқалар ўрнатилганининг 30 йиллигига бағишланган тадбирлар доирасида имзолаш маросимини ўтказишга келишиб олган.
Маълумот учун: JICA томонидан 2021 йилнинг 10—30 июнь кунлари Ўзбекистон тарихи давлат музейи ҳамда Термиз археология музейларида ва Термиз шаҳри яқинидаги археологик объектларда ўрганиш ишлари олиб борилган.
Мавзуга доир:
Изоҳ (0)