Ижтимоий тармоқлар орқали мактабларда ўқув жараёни вақтинчалик онлайн шаклга ўтгани сабабли муассасалардаги иситиш тизими ўчириб қўйилгани, ваҳоланки ўқитувчилар мактабда ўзининг мажбуриятлари билан боғлиқ фаолиятни давом эттираётгани айтилган мурожаатлар келиб тушди. Халқ таълими вазирлиги ҳолатга муносабат билдирди.
Қайд этилишича, Халқ таълими вазири ўринбосари Иброҳим Жўраев мактабларда иссиқлик таъминотини узлуксизлигини таъминлаш юзасидан ZOOM платформаси орқали ҳудудлардаги масъуллар билан видеоконференция орқали тезкор йиғилиш ўтказган. Вазир ўринбосари мактабларда иш фаолиятини амалга ошираётган ўқитувчиларга зарур шарт-шароитларни яратиш чораларини кўриш бўйича кўрсатма берган.
Жумладан, барча мактаблар куз-қиш мавсумига тайёрлиги, синф хоналарини иситишга барча зарур воситалар мавжудлиги боис мактабларда иситиш тизимини узлуксизлигини таъминлашга вилоят бошқарма бошлиқларига шахсан масъул эканликлари қайд этилган.
Эслатиб ўтамиз, 7 январь куни Ўзбекистонда коронавируснинг омикрон штамми аниқланганди. Шу сабабли Республика махсус комиссиясининг қарори билан 15 январдан бошлаб мамлакатда бир қатор чекловлар жорий этилди. Жумладан, турли тадбирлар ташкил этиш тақиқланди, эмланмаган ходимлар ишга қўйилмайди. Олий таълим муассасалари талабалари ўртасида таътил давомида коронавирус инфекциясига қарши тўлиқ эмлаш чоралари кўрилади. Ўзбекистон аэропортларида коронавирусга қарши мажбурий тест топшириш жорий этилди. Шунингдек, мактаблар 24 январдан бошлаб бир ой давомида онлайн фаолият олиб боради.
Мавзуга доир:
Изоҳ (0)