Qarshi davlat universitetida ko‘plab daraxtlarning kesib tashlangani holati viloyat prokuraturasi tomonidan o‘rganilmoqda. Bu haqda Bosh prokuratura matbuot xizmati xabar berdi.
Universitet hududidagi daraxtlar kesilgani haqidagi xabar 11-yanvar kuni ijtimoiy tarmoqlarda tarqalgandi. Ekologiya va atrof-muhitni muhofaza qilish davlat qo‘mitasi mazkur holat yuzasidan 13—15-yanvar kunlari o‘rganish ishlarini olib borganini e’lon qildi.
Ma’lum qilinishicha, Qarshi davlat universiteti tomonidan Yagona davlat interaktiv xizmatlari portali orqali davlat o‘rmon fondiga kirmaydigan daraxtlarni kesish uchun uch marotaba murojaat qilingan. Qashqadaryo viloyati Ekologiya va atrof-muhitni muhofaza qilish boshqarmasi tomonidan mazkur murojaatlarga rad javobi berilgan. Shunga qaramay, universitet hududidagi jami 38 tup daraxt noqonuniy kesilgani aniqlangan.
Mazkur qonunbuzarlik holati bo‘yicha o‘simlik dunyosiga yetkazilgan zarar 267,5 million so‘m miqdorida hisoblangan.
Bosh prokuratura matbuot xizmati xabarida ta’kidlanishicha, o‘rganish natijasi yuzasidan ma’lumot beriladi.
Eslatib o‘tamiz, davlat o‘rmon fondiga kirmaydigan daraxtlar va butalar qimmatbaho navlarining kesilishiga moratoriyning amal qilishi prezident farmoni bilan muddatsiz davrga uzaytirilgan.
Avvalroq Andijonda 12 tup daraxt noqonuniy kesilgani yuzasidan jinoyat ishi qo‘zg‘atilgani, Yunusobodda qurilish rejalashtirilgan hududdagi 10 ta qarag‘ay arralab ketilgani bo‘yicha jinoyat ishi qo‘zg‘atilgani, Toshkentda 81 ta daraxtning kesilishiga oid tergov ishi qayta tiklangani haqida xabar berilgandi.
Izoh (0)