Ўзбекистонда 2021 йилда 19 минг 967 та меҳнатни муҳофаза қилиш тўғрисидаги қонунчилиги бузилиши аниқланган. Бу ҳақда АОКАда ўтказилган брифингда Бандлик ва меҳнат муносабатлари вазирлиги ахборот хизмати раҳбари Мавжуда Мирзаева маълум қилди.
Қайд этилишича, кўрсаткич 2020 йилда 11 минг 621 тани ташкил этган. Ҳолатлар юзасидан 1970 нафар айбдор шахсга жами 3 миллиард 340 миллион сўм жарима қўлланган.
Ишлаб чиқариш билан боғлиқ 810 та бахтсиз ҳолат қайд этилган. Шундан 54 таси гуруҳий, 558 таси оқибати оғир, 198 таси ўлим билан тугаган бахтсиз ҳодисалар ҳисобланади. Ишлаб чиқаришдаги бахтсиз ҳодисалар оқибатида 907 киши жароҳатланган, улардан 238 нафари ҳалок бўлган, 632 нафари оғир тан жароҳатини олган ва 37 нафари енгил турдаги жароҳатлар олган.
Текшириш натижалари бўйича 596 нафар айбдор мансабдор шахслар жами 1 миллиард 380,9 миллион сўм жарима қўллаш тартиби бўйича маъмурий жавобгарликка тортилган, 199 нафар мансабдор шахсга нисбатан жиноий иш қўзғатилган.
Эслатиб ўтамиз, Ўзбекистонда 2020 йилда ишлаб чиқаришда 607 та бахтсиз ҳодиса содир бўлган. Оқибатда 693 нафар ходим жабрланган, шундан 201 нафари ҳалок бўлган.
Изоҳ (0)