Футбол бўйича Африка Миллатлар Кубогида гуруҳ босқичи якунланди ва нимчорак финал босқичининг барча жуфтликлари маълум бўлди.
Камерун А гуруҳида қийинчиликсиз биринчи ўринни эгаллади. 3 ўйинда 2 та ғалаба ва битта дуранг. Иккинчи ўринни эгаллаган Буркина-Фасо ва учинчи ўриндаги Кабо-Верде жамоалари 4 очкодан жамғариб, плей-офф босқичига йўл олди.
B гуруҳида Сенегал битта пенальти орқали гуруҳда биринчи ўринни эгаллади. 1-турда Садио Мане 97-дақиқада Зимбабвега пенальтидан гол урди ва жамоасининг ғалабасини таъминлади. Кейинги икки ўйинда эса 0:0 ҳисобидаги дуранг қайд этилди. Бу эса Сенегалнинг 5 очко билан гуруҳда етакчилик қилишига етарли бўлди. Ундан кейинги ўринларда Гвинея ва Малави жамоалари жойлашган. Ҳар икки терма жамоада ҳам 4 очкодан мавжуд. Малави ўз тарихида биринчи марта плей-офф йўлланмасини қўлга киритди.
Марокаш C гуруҳининг фаворити эди ва шу номни оқлаган ҳолда биринчи ўрин билан гуруҳдан чиқди. Пьер-Эмерик Обамеянгсиз Габон гуруҳда иккинчи ўринни эгаллади. ФИФА рейтингида 132-ўринда бораётган Комор ороллари ҳам кутилмаганда плей-офф йўлланмасига эга чиқди. Таркибида бирорта ҳам Коморда туғилган футболчи бўлмаган терма жамоа 3 очко жамғариб, энг яхши учинчи ўрин эгалари учун бериладиган йўлланмани қўлга киритди. Гана эса гуруҳда тўртинчи ўринни эгаллади ва сенсацион тарзда плей-офф йўлланмасидан мосуво бўлди.
D гуруҳида биринчи ўринни эгаллаган Нигерия мазкур босқичнинг учала ўйинида ҳам ғалаба қозонган ягона жамоа бўлди. Муҳаммад Салоҳ бошчилигидаги Миср эса 6 очко билан иккинчи ўринни қўлга киритди.
E гуруҳида эса кутилмаган вазият юзага келди. Мусобақанинг амалдаги ғолиби Жазоир 1 очко билан гуруҳда тўртинчи ўринни эгаллаб, ўз юришини тўхтатишга мажбур бўлди. Бунга қадар жазоирликлар 34 ўйиндан буён мағлубиятсиз серия қайд этаётган эди. Кот-д’Ивуар 7 очко билан биринчи, Экваториал Гвинея 6 очко билан иккинчи ўринни эгаллаб, кейинги босқичга йўл олди.
F гуруҳида Мали 2 ғалаба ва битта дуранг билан биринчи ўринни эгаллаган бўлса, Гамбия ҳам худди шундай натижа билан иккинчи ўринни банд этди. Тунис 3 очко билан энг яхши учинчи ўрин эгаларидан бирига айланди.
1/8 финалда қуйидаги жуфтликлар ўзаро баҳс олиб боради:
- Буркина-Фасо — Габон
- Нигерия — Тунис
- Сенегал — Кабо-Верде
- Мали — Экваториал Гвинея
- Гвинея — Гамбия
- Камерун — Комор ороллари
- Кот-д’Ивуар — Миср
- Марокаш — Малави
Изоҳ (0)