Бразилияда Pfizer вакцинаси билан эмланган 10 ёшли боланинг юраги тўхтаб қолди

Бразилияда янги турдаги коронавирус инфекциясига қарши эмланган 10 ёшли боланинг юраги тўхтаб қолди. Бу ҳақда Ленсойс-Паулиста (Сан-Паулу штати) шаҳри маъмуриятига таяниб, «ТАСС» хабар берди.

«10 ёшли йигитчанинг юраги болалар учун мўлжалланган Pfizer вакцинасини олганидан сўнг тўхтаб қолди», — дейилади маҳаллий ҳукумат баёнотида. Таъкидланишича, реанимация муолажаларидан сўнг, бола ўзига келган, ҳозирда унинг аҳволи барқарор бўлиб, шифокорлар назорати остида қолмоқда. Шаҳар мерияснинг қайд этишича, бола астмадан азият чеккан.

Содир бўлган воқеа сабаб шаҳар расмийлари болаларни коронавирусга қарши эмлашни етти кун муддатга тўхтатиш бўйича қарор қабул қилган. Бу вақт давомида COVID-19 га қарши эмлаган шу ёшдаги 46 нафар бола кузатувда бўлади. Катталар ва ўсмирларни эмлаш ишлари одатдаги режимда давом этади. Вакцинация жараёнлари қайта тикланишини кутмасдан фарзандини барибир эмлашни истаганлар рўйхатга олдиндан ёзилиб қўйишлари мумкинлиги айтилмоқда.

16 декабрь куни Миллий санитария назорати агентлиги Американинг Pfizer компаниясига тегишли коронавирусга қарши вакцинани 5 ёшдан 11 ёшгача бўлган болаларда ҳам қўллашни маъқуллаганди. Дори воситасининг болалар учун мўлжалланган Comirnaty партияси 13 январь куни етказиб берилган, шу билан бирга, 12 ёшдан катталар Pfizer’нинг оддий вакцинаси билан эмланмоқда. Бразилия Соғлиқни сақлаш вазирлиги болаларни эмлашдан олдин жамоатчилик муҳокамасини ўтказган ва 5 январдан бошлаб 12 ёшгача бўлган болаларни миллий иммунизация режасига киритиш бўйича қарорини эълон қилган.

Бразилия Соғлиқни сақлаш вазирилиги тавсиясига кўра, вакцинанинг биринчи ва иккинчи дозаси орасидаги муддат ишлаб чиқарувчи айтганидек уч ҳафта эмас, балки саккиз ҳафта бўлиши керак. Бу миокардит каби салбий оқибатлар юзага келиш хавфини камайтиришга хизмат қилади.

Аввалроқ Исроилда апрелдан чақалоқларни коронавирусга қарши эмлаш бошлангани, Бразилия президенти ўз қизини коронавирусга қарши эмлатишдан бош тортгани, Австрия Евроиттифоқ мамлакатларидан биринчи бўлиб мажбурий вакцинацияни жорий қилгани тўғрисида хабар берилганди.