Санитария-эпидемиологик осойишталик ва жамоат саломатлиги хизмати маълумотига кўра, 2022 йилнинг 5—15 январь кунлари Ўзбекистонда жами 300 мингдан зиёд ПЗР-тест синамаси ўтказилган. Бу ҳақда ССВ матбуот хизмати хабар берди.
Таъкидланишича, сўнгги кунларда эса кунига ўртача 45-50 минг нафарга яқин фуқародан ПЗР-тест олинмоқда. Маълумот учун, 2021 йил декабрь ойининг охирги ҳафтасида юртимизда кунига 15-20 минг дона ана шундай синама таҳлиллари ўтказилган.
Тошкент шаҳрининг 12 та туманида 1 тадан махсус COVID-поликлиникалари фаолияти йўлга қўйилгани, уларда коронавирусга қарши ПЗР-тест синамалари ҳар куни 24 соат давомида топширилиши мумкинлиги тўғрисида хабар берилганди. Бундан ташқари, фуқаролар Санитария-эпидемиологик осойишталик ва жамоат саломатлиги хизматининг ҳар бир туман ва шаҳар бўлимларида ҳам шундай имкониятдан фойдаланишлари мумкин. Ушбу лабораторияларда ПЗР-тест таҳлиллари ҳар куни 24 соат давомида бепул ўтказилади.
Аввалроқ Зангиота 1-сон юқумли касалликлар шифохонаси директори Анвар Ҳусанов коронавируснинг янги тури олдинги дельта ва «британча» штаммларига нисбатан бироз енгил ўтаётганини маълум қилганди. Унинг сўзларига кўра, айни пайтда муассасада коронавирусга чалинган 1300 нафардан зиёд бемор даволанмоқда. Сўнгги кунларда аҳоли орасида касалланиш ҳолатлари кўп кузатилаётгани боис, 5 январдан шифохонага мурожаат қилаётган беморлар сони ҳам кескин ошган.
Изоҳ (0)