Туркиянинг «Адана Демирспор» клубининг 31 ёшли ҳужумчиси Марио Балотелли яна Англия Премьер Лигасига қайтиши мумкин. «Ньюкасл» италиялик ҳужумчига қизиқиш билдирган.
Қайд этилишича, «Ньюкасл»дан ташқари, араб клублари ҳам Балотеллини ўз сафига қўшиб олмоқчи бўлган, бироқ «Демирспор» раҳбарияти футболчи қўйиб юбормаслигини айтган.
Балотеллининг турк клуби билан амалдаги шартномаси 2024 йилгача мўлжалланган. Италиялик футболчи 2021 йилдан бери мазкур клуб шарафини ҳимоя қилиб келмоқда.
Марио 2021/22 йилги мавсумда барча мусобақалар доирасида 20 та ўйинда майдонга тушиб, 8 та гол ва 4 та голли узатмага муаллифлик қилди.
Эслатиб ўтамиз, Балотелли АПЛда «Ливерпуль» ва «Манчестер Сити» каби клубларда тўп сурган.
«Ньюкасл» Англия чемпионатида 20 та ўйин ўтказган ҳолда 12 очко билан мусобақа жадвалида 19-ўринни эгаллаб турибди. Жамоа 17-ўриндаги «Уотфорд»дан 2 очкога ортда қолмоқда.
«Ньюкасл Юнайтед» 2021 йилнинг октябрь ойида Саудия Арабистони ҳукумати давлат инвестиция фонди (PIF – Public Investment Fund) томонидан сотиб олинди. Бу футболга эгалик қиладиган компаниялар ичида энг бойи ҳисобланиб, шахсан Саудия Арабистони валиаҳд шаҳзодасига алоқадор.
Изоҳ (0)