Чехиянинг Влашим шаҳрида истиқомат қилувчи фуқаро қасддан коронавирус инфекциясини тарқатишда айбланмоқда ва у уч йилга озодликдан маҳрум этилиши мумкин. Бу ҳақда ҳуқуқ-тартибот органларига таяниб, Блеск газетаси хабар берди.
Таъкидланишича, 2021 йилнинг ноябрида 43 ёшли эркакнинг коронавирусга топширган тести ижобий чиққач, унга уй шароитида ўзини ўзи яккалаш буюрилган.
Шунга қарамай, бемор жамоат жойларига ниқоб ёки респираторсиз ташриф буюрган. Хусусан, у ҳимоя воситаларисиз қариндошларининг уйига борган. У ерда ёнғин юзага келгач, фавқулодда ҳолат жойида ишлаган 80 га яқин ўт ўчирувчи, полициячи ва тиббиёт ходимларини касаллик юқиши хавфи остида қолдирган.
Полициянинг аниқлашича, эркак жами 100 га яқин одам билан алоқада бўлган, уларнинг қанчасига COVID-19 юққани номаълум.
Қонунбузарга нисбатан жиноят иши қўзғатилган.
Аввалроқ Бельгия ва Чехияда минглаб одамлар аҳолини мажбурий вакцинация қилиш ва чеклов чораларига қарши норозилик билдириш мақсадида кўчаларга чиққани тўғрисида хабар берилганди. Андрей Бабиш бошчилигидаги олдинги ҳукумат Чехиянинг 60 ёшдан катта бўлган барча фуқаросини COVID-19 га қарши мажбурий эмлаш бўйича қарор қабул қилган. У мартдан бошлаб кучга киради. Пётр Фиала раҳбарлигидаги янги Вазирлар Маҳкамаси мажбурий вакцинация бўйича ҳозирча якуний қарор қабул қилмаган.
Изоҳ (0)